Urørt doaimmahus atná unohassan dieđuid mat Árdna reportášain leat boahtán ovdan Rotaaimo joavkku birra. Prošeaktajođiheaddji Geir Homen muitala dál, ahte sii leat váldán oktavuođa olbmuin gii máhttá sámegiela. Dát olmmoš galggašii de jorgalit teavsttaid dárogillii, vai de dalle sáhtášedje albmaláhkái árvvoštallat daid.
Eai liiko dása
- Mii eat liiko dasa ahte min siidduide biddjojit lávlagat mat sáhttet dagahit, ahte olbmot dovdet iežaset soardašuvvan. Dáinna sii rihkkot min njuolggadusaid. Ovdalgo diibmu lea vássán galggašeimmet ožžon vástádusa sus gii jorgala teavsttaid. Dalle de mearridat maid mii dahkat, čállá Holmen šleađgapoasttas maid lea sádden Árdna doaimmahussii.
Sáhttet jávkaduvvot
Rotaaimo čállá iežas birra, ahte sin musihkka sáhttá jávkadit sápmelaččaid duoddaris, muhto dál sáhttá baicce Urørt jávkadit dán joavkku iežas siidduin.
- Jus čájehuvvo ahte teavsttat rihkkot njuolggadusaid; Leage várrugas plakáhta ja Váldodoaimmaheaddji plakáhta, de doaimmahus sihkku eret joavkku neahttasiiddu. Dalle sáddejuvvo maid jovkui čilgehus manne sin siidu lea jávkan Urørt neahttasiiddus, čilge Holmen.
