NRK Meny
Normal

Rámida Finnmárkku

Gitáračuojaheaddji Ronni Le Tekrø lohká Kárášjogas eambbo rock `n roll dábálaš maŋŋebárggaid go Oslos lea lávvardagaid. Dán vahkkoloahpa su joavku TNT ja Intrigue čuojahit Hámmárfeasttas.

TNT
Foto: Preassagovva

Ronni Le Tekrø lea okta máilmmi buoremus garrarock gitáračuojaheaddjiin ja son lea čuojahan TNTs álgoálggu rájes.

Dán jagi joavku ávvuda 25 jagi ja dan oktavuođas sii johtet viidát. Otne ja ihttin lea joavkkus konsearta Hámmárfeasttas. Mielde konsearttain lea Kárášjoga joavku Intrigue.

- Šaddá suohtas

TNT logo

TNT logo

Foto: TNT preassagovva

- Doaivvun duođaid ahte Hámmárfeasttas šaddá eallin dán vahkkoloahpa. Doaivvošin ahte sii morihit. Mus leat leamaš erenoamáš buorit konseartavásáhusat Kárášjogas. Dan gal hálidan dadjat, lohká Ronni Le Tekrø Sápmi dál jearahallamis.

Eará sániiguin daddjon, don loavttát bures Finnmárkkus?

- Dan gal duođaid dagan. Mun lean máŋgii leamaš doppe go lean bargan ovttas Intrigue joavkkuin ja iežan čuojahanmátkkiin iešguđet joavkkuiguin. In leat dušše TNTin johtán, muhto lean olu leamaš Finnmárkkus, muitala Tekrø

Rámida Intrigue

Kai Somby
Foto: Dan Robert Larsen / NRK

- Mun duođaid illudan Hámmárfeastta konsearttaide ja maiddái go dál beasan fas deaivat Intrigue gánddaid. Šaddá stuorra eahket. Ja de leimmet jurddašan maŋŋá otná konseartta doallat eahpevirggálaš juovlabeavddi. Danne jáhkán ahte šaddá somás mátki, bohkosa Ronni Le Tekrø.

Nu ahte dus leat stuorra vuordámušat Intrigue jovkui?

Jo, dát šaddá hirbmat suohtas. Dál in leat Intrigue oaidnán čuojaheamen konsearttas guovtti jahkái. Danne šaddá somá sin oaidnit, vástida Tekrø.

Eai gáddálasat

Gitára máilmmenásti lohká iežas liikot finnmárkolaččaide go singuin lea nu álki oahpásmuvvat.

- Finnmárkolaččat eai leat gáddálasat. Dáppe lea hirbmat álki oažžut oktavuođa olbmuiguin. Tromssa filkkas lea olu váddáseappot, čilge Tekrø ja himáhallá.

Manne navddát dili ná?

- In dieđe. Jáhkán dán speadjalastit dan dovddu mii smávvabáikkiin muđuid lea norggas. Ii leat dušše Finnmárku ja Kárášjohka gos lea ná, muhto lea njulgestaga stuorra erehus giliid ja gávpogiid gaskkas, navdá Ronni Le Tekrø.

Gula jearahallama