Ráđđehusa beales eai dáhto njuolgga vástidit manne sii eai miehtan Fovse-boazodolliid gáibádussii njeaidit bieggaturbiinnaid Fovsen njaarke boazodoallo-orohagas.

Goappaš joavkkut orohagas leat dál vuolláičállán šiehtadusa huksejeddjiin, ja nu formálalaččat loahpahuvvui olmmošvuoigatvuođarihkkun, maid Alimusriekti cuigii iežas duomus 2021:s.

Otne dovddaha boazodoalli Terje Haugen ahte boazodoallofágalaš oainnu vuođul háliidedje sii njeaidit 45 bieggaturbiinna, go dalle livčče sis leamaš doarvái dálveeatnamat. Go dan eai ožžon dohkkehuvvot, de lei dárbu oažžut liigeareála.

Eanergiijadepartemeanttas eai vástidt njuolgga gažaldahkii manne diesa eai miehtan.

– Dán áššis leat leamaš vuđolaš ráđđádallamat. Ja dás bođii boađusin ahte bealit vuolláičálle šiehtadusa. Šiehtadusain lea leamaš mihttomearrin sihkkarastit boazodolliide vejolašvuođa joatkit iežaset kulturárbbiin ja ealáhusain, lohká departemeantta stáhtačálli Elisabeth Sæther.

Son ii ge njuolgga kommentere dan go boazodoallit dovddahit ahte sis ii leat leamaš nu čielga válljenmonni dán áššis, ahte molssaeaktu livčče lean olu jagiid vuot eahpesihkkaris dilis vuorddašit jos eai lean vuolláičállit šiehtadusa.

– Boazodoallit serve eaktodáhtolaš soabadallamii. Dás leat leamaš sorjjasmeahttun soabadallit geat leat láidestan soabadallamiid. Riikaviidosaččat lea dát bargovuohki maid dohkkehuvvon vuohki čoavdit riidduid, deattuha Sæther.

Dálvit 2026/2027 galggašedje orohagat leat ožžon daid ođđa dálveguohtuneatnamiid, maid sii dál soahpamuša bokte leat ožžon lohpái.