Ida Kristine Juuso Seppola (20) ii leat ieš boazosápmelaš. Son goitge oaivvilda ahte dovddus dáža komihkkár Otto Jespersen gilvá giellásiid boazosápmelaččaid birra satiira videos.
– Go gehččen dán video, de mus šattai dieđusge váivi ja láittas. Mon suhtten go oidnen dan ja jurddašin ahte dat ii leat ortnegis obage, lohká Ida Kristine Juuso Seppola, gii ássá Stïentjes (Steinkjeras), Trøndelágas.
BIVDIT ÁNDAGASSII: Ida Kristine Juuso Seppola dáhtu ahte Jespersen atnu ándagassii.
Foto: PrivatTV 2 Nyhetskanalen almmuhii cuoŋománu 23. beaivve video kanála Facebook-siiddus.
Videos komihkkár Otto Jespersen dadjá ahte go Davvi-Norgga ruovdemáđidja huksejuvvo, de eai dárbbaš boazosápmelaččat hutkat giellásiid das movt goaskin lea goddán bohccuid.
Dalle besset dušše almmuhit eiseválddiide ahte 300 bohcco leat vuddjon togii. Ja de sii fidnejit jahkebálkká.
- Geahča video:
– Leaikkas fertejit leat váikkuhusat
Juuso Seppola mielas lea hui duođalaš go dákkár dovddus olmmoš Norggas dadjá diekkáriid sámiid birra.
Dát nanne ovdagáttuid ja cielaheami sámiid ja boazosápmelaččaid vuostá, oaivvilda son.
– Mon han oidnen Facebookas dán video vuolde kommentáraid ahte olbmot dadjet dan seamma. Son han dego čájeha olles Norgii ahte lea ortnegis dadjat dákkár diŋggaid sápmelaččaid birra.
– Dovddus gielalaččat liiggástallat
Otto Jespersen lea okta Norgga dovdoseamos komihkkáriin, ja su dovdomearka lea čiekčat juohke guvlui ja liiggástallat gielalaččat.
Nu čilge TV 2 ođasredaktevra Karianne Solbrække e-poasttas NRK Sápmái.
– Muhto satiira lea váttis šáŋŋer. Dat, mii lea somá soapmásii, sáhttá fas leat unohas earáide. Go dáinna lágiin leaikkastallá, de sáhttá eaddudit, muhto dat ii dárbbaš leat doarvái buorre ágga ahte ii galgga nu leaikkastallat, dadjá Solbrekke.
OĐASREDAKTEVRA TV 2: Karianne Solbrække.
Foto: Alex Iversen / TV 2– Rihkku lága
Diibmá dubmejuvvui 50-jahkásaš dievdu Nordlánddas go lei ovddidan vaššiságaid sápmelaččaid birra.
Juuso Seppola oaivvilda ahte komihkkár Otto Jespersen maid dáinna njuolgut rihkku ráŋggáštuslága ja vealaha ja ovddida vaššisága sápmelaččaid birra.
TV 2 ođasredaktevra Karianne Solbrække šiitá ahte TV 2 dáinna videoin ovddida rasismma ja cielaheami.
– Diet teaksta falleha Bargiidbellodaga eanemus. Jus leat čuvvon Otto satiirra dán giđa, de leat oaidnán ahte son dáinna deaivá viidát ja garrasit, sihke politihkkáriid, guovlluid, bellodagaid ja earáid, dadjá Solbrekke.
– Ferte átnut ándagassii
Solbrekke deattuha ahte dá lea satiira ja ii galgga duođas váldot.
– Mu mielas lea hui čielggas ahte su teavsttat čielgasit liiggástallet ja daid ii galgga duođas váldit, muhto lea buorre almmolaččat digaštallat gokko dán šáŋŋera rájit galget mannat, dadjá Solbrekke.
20-jahkásaš gal vuordá ahte Jespersen njulge dán boasttuvuođa.
– Na, son berre ovddemus geahččalit ipmirdit manne dat ii leat ortnegis ja de bivdit ándagassii, nu ahte dat olbmot geat leat oaidnán dán video ipmirdit ahte dat ii leat ortnegis, dadjá Juuso Seppola.
