Guovdageainnus leat mearkkašahtti ollugat fárremin eará báikkiide. Logut maid NRK Sápmi dušše ikte nagodii čoaggit, čájehit ahte 45 olbmo leat áiddo fárren, dahje leat fárremin. Ovttas-ássit Jan Mathis Gaup ja Kristina Anti ferteba fárret, go Gaup ii ožžon barggu Guovdageainnus, muitala Kristina.
- Lea vahát go dáppe eai oro vuoruheamen báikkálaš olbmuid, jus guktuiguin livčče bargu, de boađášeimme vajot ruovttoluotta.
Ja go Kristina ovttas-ássi gii lea elektro nammasaš oahpu váldán ii ožžon barggu, de geahččalii son ohcat virgelobi dearvvašvuođa suorggis gos barggai. Dan ii ožžon, ja fertii cealkit eret virggi ja dasto soai fárreba mánáineaskka Áltái.
Gelbbolašvuohta báhtara
Eatnasat dain 45 olbmos geat leat jo ollen fárret ja leat ráhkkaneamen fárret, leat smávvamánná bearrašat. Ja Guovdageaidnu massá sihke sámegielat doaktára, máŋgga suorggi dearvvašvuođabargiid, earret eará mánáidsuodjalus pedagoga. Oassi eretfárrejeddjiin leat maid oahpaheaddjit, ráđđeaddit, elfápmobargit ja moattis leat maid ealáhahkii ollen, eai ge hálit boarásnuvvan beivviid orrut Guovdageainnus.
Várresátnejođiheaddji, Hans Isak Olsen ii hirpmahuva eretfárremiid dihte.
- Su mielas dies ii leat nu dramatihkka, lea dábálaš, ahte olbmot fárrejit eret ja nuppit bohtet sadjái.
Statistihkalaš guovddášdoaimmahaga loguid miel orrot Guovdageainnus dál vuollelaš golbmaduháha (2931) olbmo ja čavčča miel unnu min dieđuid miel dát máŋggainlogiin. Kristina mielas lea heitot go su ovttasássi, gii lea Guovdageaidnulaš, ii ožžon barggu go gearggai oahpuin.
