NRK Meny
Normal

Kulturministtar lohpida ruhtadoarjaga Riddu Riđu festiválii

-Norgga ráđđehusa Kulturministtar, olgešbellodaga, Torhild Widvey dáhkida ahte Riddu Riđđu ain galgá oažžut ruđalaš doarjaga Norgga Kulturráđis, vaikko ráđđehus evttoha dálá guovddášfestivála ortnega heaittihuvvot.

Kulturminister Torhild Widvey

Kulturministtar, Torhild Widvay lohpida ruđaid Riddu Riđđui.

Foto: Kari Nygard Tvilde / NRK

Lea dárbbašmeahttun ballu Riddu Riđu ruhtadeami ektui, go festivála gal oažžu ruhtadoarjaga boahtte jahkái, Norgga Kulturráđi bakte. Nu dadjá Ráđđehusa kulturministtar, Torhild Widvey maŋŋil ievttá čoahkkima Romssa fylkkasuohkana, Sámedikki, Gáivuona suohkana ja Riddu Riđu ovddasteddjiiguin.

—Vaikko daddjo ahte doarjja Riddu Riđđui ain ovddasguvlui galgá juolluduvvot Norgga Kulturráđi bakte, de dat ii leat seamma go bistevaš doarjja stáhtabušeahta bakte. Nu dadjá Riddu Riđu stivrajođiheaddji, Christina Henriksen, ja lasiha ahte bistevaš doarjja dagahivččii vuordevaš ja diehttevaš dili.

Earenoamáš festivála

Christina Henriksen

Riddu Riđu stivrajođiheaddji muittuha man dehálaš Riddu Riđu festivála lea.

Foto: Heaika N. Skum / NRK

Ráđđehus ja kulturministtar eai oro riekta ipmirdan man dehálaš Riddu Riđđu festivála obanassiige lea. Mii han leat álgoálbmotfestivála, seammás go Riddu Riđus lea sierra mánáid ja nuoraiddoalut, ja sii han maiddái almmuhat sierra nuorra dáiddára, dadjá Henriksen.

Son muittuha ahte dán jagi Davviriikkaid Ráđi girjjálašvuođa bálkkašumi evttohas, Niillas Holmberg lei Riddu Riđu nuorra dáiddár mannán jagi festiválas. Jus ráđđehusa áigumuš čađahuvvo, de áidna festiválat mat de báhcet guovddášfestiválan leat Davvi-Norgga musihkkariemut Harstadas ja Musihkkariemut Bergenis.

Riddu riđu sajádat lea áibbas earenoamáš, man ii obage sáhte buohtastahttit eará suorgefestiválaiguin, dadjet Riddu Riđu stivrajođiheaddji, Christina Henriksen.

Eai áiggo vuollánit

Svein O. Leiros

Ordfører i Kåfjord, Svein Leiros er ikke tvil om at støtten til Riddu Riđđu bør beholdes og stŧrkes.

Foto: Heaika Skum / NRK

Gáivuona sátnejođiheaddji, Svein O. Leiros ii loga gal áigut vuollánit, ja lohpida suohkana bargat maid sáhttá vai Riddu Riđđui várrejuvvo ruhtadoarjja stáhtabušeahta bakte.

Davvi Romssa ovddasteddjiin lei ovttamielalašvuohta das ahte Riddu Riđđui berre sihkkarastojuvvot sierra doarjja stáhtabušeahta bakte, iige dušše sirdojuvvot Sámedikki ruhtadanortnegiid vuollái.

Gáivuona sátnejođiheaddji, Svein O. Leiros muittuha ahte dálá Riddu Riđđu lea ahtanuššan smávit báikkálaš doalus dálá riikkaidgaskasaš festiválan. Dat čalmmustahttá sihke sámi ja mearrasámi kultuvrra ja muđui nai álgoálbmot kultuvrraid báikkálaš dásis gitta riikkaidgaskasaš dássái.

Leiros muittuha man ollu dilli lea rievdan buoret guvlui das rájes go sámevuohta beaggigođii Olmmáivákkis ja Gáivuonas muhtumat báhčališgohte sámegielat luoddagalbbaid otnáža ektui go vásihit ahte Gáivuona olbmot gábavuođain čájehit sámevuođasteaset. Dán beali eai ruhtaeiseválddit oro oaidnán eaige fuomášan, dadjá Gáivuona sátnejođiheaddji, Svein O. Leiros.

Bargiidbellodat doarju Riddu Riđu festivála

Kulturministtar lea rihkkon gulahallansoahpamuša Sámedikkiin sáhtát dárogillii lohkat dás: