Golggotmánu 18. beaivve 1944:s rasttildii ruošša soahteveahka rájá gaskkal Norgga ja Sovjetlihttu. Maŋŋá garra doarrumiid ruošša- ja duiskka soahteveaga gaskka de fertejedje duiskalaččat báhtarit ja guođđit Girkonjárgga ja bidjalit oarjjás. Golggotmánu 25. beaivve 1944:s besse olbmot Girkonjárggas fas vásihit friddjavuođa.
Moadde beaivve maŋŋá mearridii Hitler ahte finnmárkulaččat galge bákkus fárrehuvvot máttás ja Finnmárku ja davvi Tromsa galggai boldojuvvot danin go ruoššaide ii galgan mihkkege báhcit ávkin go dađistaga soahtefámuin válde Finnmárkku. Nu dat jáhkke Duiskka soahtehearrát geavvat muhto nu han ii dáhpáhuvvan.
Mearrasápmelaččat eai masage ávkin
Čakčat 1944:s sáddejuvvui dalá Norgga politiijaministtar Jonas Lie Finnmárkui gos galggai leat veahkkin evakueret olbmuid máttás guvlui. Nie sii navde gádjut olbmuid heahtedilis mii bođii čuožžilit go jáhkke ruošša soahteveaga fallehit olles Finnmárkku. Lie gulai Vidkun Quisling Nasjonal Samiling politihkalaš bellodahkii.
Ilgat lohkat čállosiid
Historihkkár Arvid Petterson, gii ássá Porsáŋggus, dadjá ilgadin lohkat makkár rasisttalaš oainnut Norgga politiijaministaris ledje sápmelaččaid- ja erenoamážit mearrasápmelaččaid ektui. Jonas Lie ii háliidan ahte mearrasápmelaččat galge evakuerejuvvot, su mielas lei buoret diktit sin galbmot jamas mearragáddái.
Raporttas, maid Lie čálii dan botta go lei Álttás ja Tromssas, boahtá ovdan ahte Norgga stáhtii lei dát dušše buorre danin go mearrasápmelaččat gal eai lean dohkálaččat masage, eai sii máhttán bargat ja sii sáhte maid bilidit norgga álbmoga kvalitehta jos sáddejuvvojedje máttás, lohká historihkkár Arvid Petterson.
Nasisttalaš SS-kommandánta gájui sin
Dalá Norgga politiijaministtar Jonas Lie oaivvildii ahte dat buoremus čoavddus lei jávkadit olles mearrasámi álbmoga muhto nasisttalaš SS-kommandánta Heinrich Himmler gal ii mieđihan dákkár plánaide. Himmler mielas lei baicce dehálaš doalahit sápmelaččaid "buhtisin", čállá historihkkár Bernt Rougthvedt.
Jonas Lie guđii Davvi-Norgga ja joavddai Osloi skábmamánu 27. beaivve 1944. Doppe son vel árvalii bákkus steriliseret romániálbmoga ja hukset sidjiide sierra ássanbáikki. Ovddeš Norgga politiijaministtar Jonas Lie mielas soittii vel buoret sin sáddet Nuorta-Eurohpái muhto ii son dáinna jurdagiinge ollen gosage, čállá historihkkár Bernt Rougthvedt.