Dan muitala Aslak J. Eira Gearretnjárgga orohagas. Maiddái muitala son ahte ledje stuorra váikkuhusat maŋŋel buollima.
– Dat leat billahuvvan dat eatnamat oalát dokko gos bulii, nu ahte das ii gal leat mihkkige bohccuide šat.
Eira čilge maid ahte guohtunguvlui, mii bulii 50 jagi áigi, lea easka dál šaddagoahtimin jeagil. Gearretnjárga maid vásihii buollimiid 2006:s, doppe lea ain guorbbas.
Meahccebuollimiin leat guhkesáiggi váikkuhusat, go eana ádjána šaddat.
– Várra guokte olbmo eallinagi maŋŋálaga goit ovdalgo dovdogoahtá ahte eana lea šaddamin. Oidno boares buollimiin ahte váldá guhkes áiggi, vaikke leat vel nu áigá ahte boares olbmot eai muitte goas dat lea buollán, muitala Eira.
Bahá ahte visot jeagil buollá
Norgga bioekonomiija instituhta dutki Jørund Rolstad lohká jeahkála stuorra hástalussan boazodollui, dan sivas go dat sáhttá álkit buollát.
– Jeagil buollá álkit, go dat vuos buollá, de sáhttá visot jeagil buollit oalát, lohká NIBIO dutki.
Rolstad ii loga dovdat Finnmárkku boazoguohtuneatnamiid, muhto su fágačehppodat lea jeagil.
Dutki muitala váttisin dadjat man guhká ádjána ovdalgo jeagil fas šaddagoahtá, muhto árvvoštallá birrasiid 10 jagi.
Mo dat orru ahte Gearretnjárgga orohagas easka dál lea šaddagoahtán jeagil, 50 jagi maŋŋel meahccebuollima?
– Jeagil ádjána šaddat nu mo dat lei ovdal buollima. Dat šaddá oalle njozet, ja seammás sáhttá buollát jođánit.
Giđđadálvvi lea jeagil dehálaš
Sámi allaskuvlla vuosttašamanueansa Mihkkal Niillas Sara lohká ahte jus goitge jeageleana buollá, de ádjána guhká ovdalgo šaddá fas mihkkige.
– Dieđusge dálveorohagat sáhttet leat iešguđetláganat, muhto jeageleatnamat leat dieđusge dehálaččat, erenoamážit doppe giđasdálvve bealde.
Sara lohká váttisin dadjat man guhkes áiggi váldá ovdalgo eatnamat šaddet nu mo ovdal ledje, ja diehtá ahte sii geat leat vásihan buollima dihtet dieđusge buoremusat.
Sara oaivvilda ahte lea váttis addit ráđi badjeolbmuide, geat vásihit ahte guohtuneatnamat billašuvvet buollima geažil, vuolgá das makkár eatnamat leat buollán.
– Áinnas jus jeageleatnamiid lea massán, de lea diehttalas jus jeahkáliin sáhttá biebmat, de dat livččii buot buoremus. Muhto dieđus jus dat eai leat oažžumis, de ferte eará boahtit sadjái nugo fuođđarat.