Lávvordaga ledje Guovdageainnus guokte meahccebuollima. Vuosttaš buollin lei Láhpoluobbala ja Gievdneguoika gaskkas.
Nubbi ges Hávgajávrri guovllus Anárjoga álbmotmeahci lahka. Diet buollin gal vuorjašuhttá olbmá geas leat bohccot guovllus dálvet.
– Dát buollin lei guovdu min dálveorohaga, ja stuora eananbihttá mii lea buollán. Dás gal šaddet stuora váikkuhusat midjiide, dadjá Ándde Niillas Buljo.
Buollin Hávgajávrri guovllus. FILBMEN: Simen Andre Varsi Johnsen.
Guovdageainnu buollindoaimmahaga dieđuid mielde lea buollinguovlu sullii seammá stuoris go 70 spábbačiekčanšillju.
Okta spábbačiekčanšillju lea 90 mehtera govddu ja 120 mehtera guhku.
Buollinsiva eai dieđe, muhto navdet álddagas lea bullehan eatnama.
Guohtuneatnamat unnot
Buljo gullá Láhkkonjárgga orohahkii. Dálvet lea sin eallu Njullošávžžis mii lea Hávgajávrri nuorttabeale.
Mannan dálvvi lei garra guohtunroassu boazodoalus. Ealáhusas šadde biebmat bohccuid skápma rájes gitta giđđii. Dát buollin dagaha ahte Njulloslákkuhasaid ealus unnot guohtuneatnamat.
– Dál mis unnu dálveorohat go bohccot eai sáhte guohtut buollan eatnamiid. Dat dagaha ahte mii šaddat guođohit daid eará eatnamiid orohagas mihá eambbo go ovdal. Dat iešalddis guorbada daid eatnamiid, muitala Buljo váikkuhusaid birra.
Girdipilohta Simen Andre Varsi Johnsen filbmi meahccebuollima. Lei maid son guhte dieđihii buollima birra.
Fertejit vaikko gilvit jeahkála
Orohat meidne gulaskuddat Stáhtahálddašeaddjiin makkár veahkkebijut gávdnojit dákkár bártái.
Eai boazodoallit leat vuos ásttan nu olu humadit ášši birra go orohagas leat justte dál olu barggut maid fertejit vuoruhit.
– Okta vejolašvuohta lea viežžat jeahkála eará báikkis ja geahččalit gilvit jeahkála min orohahkii, dadjá Ándde Niillas Buljo.
Ándde Niillas háliida gilvit jeahkála buollineatnámiidda vai su mánát galget ain beassat bohccuiguin bargat boahtte áiggis.
Foto: Jonas Løken Estenstad / NRKJáddadii dolaid 12 diimmu
Guovdageainnu buollinčáskadeaddji, Geir Clemet Hætta, jáddadii dolaid 12 diimmu njuolgut mannan lávvordaga.
Álggos lei son Láhpoluobbala guovllus jáddadeame, ja go doppe gearggai de son njuikii helikoptera fárrui nuorttas Hávgajávrái.
– Lei hui báhkka ja lei dehálaš juhkat olu čázi vai ii vuoimmehuvvu. Muđui gal manai jáddadan bargu hui bures.
Geir Clemet Hætta lei mielde jáddadeame guokte meahccebuollima Guovdageainnus.
Foto: Ronald Pulk / NRKSon muitala sis lea olu juhkamuš ja borramuš mielde diekkár bargguin. Lávvordaga lei maid hui vuogas biegga Hávgajávrri guovllus.
– Lei lullebiegga, ja buollinbáikki davábealde leat olu njuoskka eatnamat, nu ahte olu dolat jádde iešalddis.
Olbmot ledje eatnan alde jáddadeame, áimmus ges guokte helikoptera.
Foto: Guovdageainnu buollinčáskadeaddji govven
