Vaikko Mari Boine namma lea beaggán, ja ain beaggá miehtá máilmmi, de goit muhtun báikkiin eai dieđe olus su birra.
Dáppe Mariehamn gávpogis Ålánddas eai lean nu gallis geat dihte gii Mari Boine lea.
Go de čilgiimet ahte son dat han lea okta Sámi beakkáneamos artisttain, de gal goit muhtumat fuomášedje gean birra vikkaimet jearrat.
Luohtegielddus riegádahttán ođđa lávlagiid
Mánnán beasai Mari dávjá gullat ja vásihit ahte sámi juogan ja luohti adnojuvvui suddun, ja gahččaluvvui čihkkojuvvot.
Vaikko Mari vásihiige luođi gieldima de lea son ođasmahttán luođi go dasa lea seaguhan osiid máŋggaid eará kultuvrraid árbevieruin nugo mat jazza, rocka ja álbmotmusihka kultuvrrain.
– Vaikko luohti gildojuvvui, de dat goittot lea riegádahttán máŋga ođđa lávlagiid, muitala Marie Boine.
Mátkkošteaddji guossit
Konsertii Mariehamnas ledje boahtán badjel 100 guldaleaddji, sihke amas olbmot ja fuolkkit. Okta guldaleddjiin lei Mari oambealli, Marit Anne Länsmann, guhte ássá lahka Stockholm gávpoga Ruoŧas.
– Mus lea nieida guhte orru ja bargá Mariehamnas Ålanddas, ja vulgen nieidda guossái go gullen ahte Mari lei Mariehamnas doallamin konseartta, dadjá Marit Anne Länsmann.
Son dadjá suohtasin go iežas fuolkenieidda dáppe beasai vásihit ja gullat lávlumis ja juoigamis.
Bures vuostáiválde Mari
Guossit geat ledje boahtán konsertii bures vuostáiválde Mari.
Son geasuhii guldaleaddjit mielde sihke lávlut, juoigat ja dánsut. Buohkat geaiguin ságastallen maŋŋil konseartta, dadje ahte lei earenoamáš vásáhus gullat Mari, ja vaikko sii eai ipmirdan sámegiela, de sii goittot bures nagodedje čuovvut mielde.
Ohcaleamen guoimmi
Mari Boine lea ožžon gávcci geardde dehálaš bálkkašumiid. Earret eará lea son Spellemann-bálkkašumi golbmii ožžon, ja Davviriikkaid Ráđi musihkkabálkkašumi.
– Makkár bálkkašumi it leat ožžon man ohcalat?
Dása vástida Mari ahte son váillaha guoimmi, ja ahte dat gal livččii dakkár bálkkašumi man áinnas háliidivččii oažžut.