Studio Sámis Kárášjogas leat dál olles leavttuin filbmemin ođđa Mánáid-TV-ráiddu «Stálugilvvut».
Ráiddus leat 15 oasi ja sáddejuvvo juovllaid áigge, čilge Mánáid-TV hoavda Norleif Krokmo.
– Muitalus lea dan láhkái ahte mánát leat massán juovlaskeaŋkkaideaset. Čájehuvvo ahte Stállu dat lea vajálduhttán oastit juovlaskeaŋkkaid iežas eamidii. Danne son dolle márkanii, gos son njulgestaga suoláda skeaŋkkaid mánáin, muitala Krokmo.
Mánát eai almmatge suorgan dasa. Sii dihtet maid de fertejit dahkat.
(Ášši joatkašuvvá video vuolábealde)
– Mánát gurret Stálu luottaid ja vulget viežžat Stálus daid skeaŋkkaid. Ja Stállu han lea hui dakkár gii liiko veahtalit ja gii liiko hástalusaide. Danne mánát hásttuhit mánát su gilvalit. Nu dat leat Stálugilvvut, oanehaččat muitaluvvon, čilge Norleif Krokmo.
Neavttár Nils Henrik Buljo lea Stállu ja Sárá Máret Gaup lea Gieddegášgálgu. Muđui leat iešguđet mánát geat gilvalit Stáluin.
Vuosttaš Stálugilvvuid ráhkadii NRK Sápmi diibmá. Dalle váilui Stálus ja su eamidis biergu. Eamit sáddii dalle Stálu márkanii dainna dieđuin, ahte ii oačču boahtit ruoktot ovdalgo sus lea biergu eamidii.
Stállu mearridii dalle lágidit Stálugilvvuid, vai nákcešii mánáid fillet iežas sehkkii. Ná de fifnešii Stálu eamit bierggu iežas ruitui.