Man dehálaš lea sátni?
- Ipmirda go peršuvnnalaš luođi buorebut jus dajahallá dan olbmo go juoigá su?
- Man álki lea ipmirdit ahte lea sáhka duohta ráhkisvuođas jus dat aivve muitaluvvo govalaččat?
- Ii man ge veara dajahallama haga
-Dajahallama haga ii leat luohti man ge veara. Dan oaivvilda juoigi Ole Larsen Gaino. -Jus luođis eai dajahala, de han ii dieđe gean dahje man birra juiget, ja de manná biekka mielde, dadjá Gaino.
Gula olles jearahallama Ole Larsen Gainoin:
Go dikta šaddá lávllan
Artisttat bidjet dávjá šuoŋaid divttaide maid earát leat čállán. Okta sis gii lea čállán divttaid maidda earát leat bidjan šuoŋaid, lea sámeradiohoavda Nils Johan Heatta.
-Divtta sánit begget viidábut go šaddet lávllan, danne go leat unnán olbmot geat lohket divttaid, dadjá Heatta. -Jus sániin lea árvu, de berrejit maid dat sánit gullot lávlagis, eai ge duššat dahje hávkat musihka duohkái, dadjá son.
Gula go Nils Johan Heatta hupmá divttaid ja sániid birra;
Muhtun lávlagiin daddjo juoga njuolga, earáin ges govahallojuvvo eará sániiguin dat man birra lea sáhka.
Teakstačálli Karen Anne Buljo lea čállán "Diamántta spáillit" man Mari Boine lávlu. Dán lávlagis lea sáhka das go ruvkefitnodagat bohtet Sápmái ohcat daid riggodagaid mat gávdnojit luonddus. Karen Anne Buljo muitala ahte dovddai iežas nu geafin ja unnin, ja danne čálii lávlaga juste dán birra.
"Stállu" dán lávlagis lea ge ruvkefitnodat, ja Buljo dadjá ahte stálut han leat boahtán máŋgga hámis sápmelaččaid lusa. Nu maiddái dál go ohcet golliid ja eará minerálaid sámiid guovllus. Ja Karen Anne Buljo mielas lea dehálaš ahte guldaleaddji ipmirda man birra lea sáhka go vállje sániid lávlagiidda.
Guldal jearahallama Karen Anne Buljoin;