Lávvordaga lágiduvvui Lions messa Deanu šaldis, ja badjel duhát olbmo ledje boahtán lágidemiide ja okta lei Tuija Guttorm gii lei vuohččan márkaniin.
– Dat lea veahá hearvái go fuobmájin ahte dáppe vuvdet biillaid ja skohteriid, eai dá lean gusto duodjemárkanat. Muhto mun illudin go oidnen ahte dáppe leat nu olu sámi duojárat vuovdime gálvvuidis, muitala Guttorm.
Muhto eai buohkat gal lean vuolgán duodjeávdnasiid oastit.
–Jus duođaid galggan muitalit, de gal lean mun vuolgán deiká gáhku borrat, reašká Áike Niillas Selfors.
Duddjon márkaniidda
Ja okta gii lei vuojistan 150 kilomehtera Kárášjogas Detnui vuovdit bivuid lea Anne Biret Anti.
– Mii geat duddjot gulaskuddat gos dál leat márkanat, ja dohko mii de vuolgit. Ja lea somá vuovdit go dieđan olbmot dárbbašit bivuid ja soaitán dinet vel ieš, muitala Anti.
Duhtavaš lágideaddji
Lágideaddji Britt Elin Hætta Isaksen muitala ahte sii leat duhtavaččat dán jagáš márkaniiguin. Hætta Isaksen lea ieš bargan jo 13 jagi eaktodáhtolažžan.
–Dat addá munnje nu buori dovddu bargat eaktodáhtolaččat ja sáhtán olbmuid veahkehit. Dáinna lágiin oačču muhtin buori mu bargguin, muitala son.
Dii lágidehpet nai dánsuneahkeda otne, leatgo don dohko?
–Juo, vuolggán dánsut! Go mun barggán politiijan de in sáhte vuovdit alkohola inge bearráigeahččat lágidemiin, nu ahte de beasan vuolgit dánsut, boagusta son.