Lasi ohccit sámegieloahpaheaddji ohppui
Sámi allaskuvlii ja Davvi universitehtii leat dál eanet ohccit sámegieloahpaheaddji ohppui go diibmá. Norggas muđuid leat dán jagi unnit ohccit dán ohppui go buohtastahttá diimmá loguiguin.
Julevsámi oahpaheaddji ohppui Bådådjos leat 6 ohcci ja máttasámi oahpaheaddji ohppui leat ges 4 ohcci.
Davvi universitehta (dárogillii: Nord universitet), lea hui duhtavaš dáid loguiguin.
– Dá lea hui dehálaš oahpahus ja áigut vuoruhit oahpahusa vaikko vel geavaš ge nu ahte muhtumat dáid ohcciin eai álgge, lohká universitehta diehtojuohkki, Tor Dybdal-Holthe.
Sámedikkis lea sierra stipeandaortnet man bokte juolluda studeanttaide 50.000 norgga ruvnnu. Sii leat maid bidjan návccaid dasa ahte čalmmustahttit oahpahusfálaldagaid.
Linnéa Knutsen lea daid gaskkas guhte lea ohcan julevsámi oahpaheaddji ohppui.
Sutnje lea dehálaš dán láhkai leat mielde nannemen sámegieloahpahusa. Seammás lea maid Sámedikki ruhtadeapmi dehálaš go olmmoš lea studeanta.
– Dáinna ortnegiin oažžu olmmoš ekonomalaš oadjebasvuođa studeantan, maid eará studeanttat eai oaččo. Ja lea maid oalle sihkkar ahte olmmoš oažžu barggu go lea geargan oahpuin, lohká son.