Čalmmustahttá dáidagiin ahte Sámis lea nissonolmmoš álo leamaš guovddážis

Gudnejahttin dihtii nissonbeaivvi, sprayi Kamilla Marie Triumf (28) Sáráhkká seaidnái.

Kamilla Marie Triumf

SÁRÁHKKÁ: Kamilla Triumf sprayestii Sáráhkká, čájehan dihtii man dehálaččat sámi ipmilat leat sámi kultuvrras. Terje Grimmen fuomášii sámi dáiddára instagramas ja bovdii su street-graffiti oahpahit nuoraide.

Foto: Privat

Njukčamánu 8. beaivi lea riikkaidgaskasaš nissonbeaivi, ja gudnejahttin dihtii dán beaivvi, lágidii Romssa njukčamanu 8. beaivvi lávdegoddi graffiti bargobaji nuorra nieiddaide mannan vahkoloahpa.

Dohko lei guovdageaidnulaš pop-dáiddár Kamilla Marie Triumf maid bovdejuvvon veahkkin ja oahpaheaddjin, ja ieš son sprayi ođđaáigásaš Sáráhkká seaidnái.

– Jurdda lei čájehit ahte sápmelaš lea atnán nissonolbmo guovddážis. Sus lei olu dadjamuš, ja dat lea ain nu, muitala Triumf.

Popkunstner Kamilla Marie Triumf på 8. mars workshop

POP-DÁIDDÁR: Triumf ráhkada pop-dáidaga ja illustrašuvnnaid, ja bovdejuvvui bargobadjái movttiidahttit nuoraid.

Foto: Johan Ante Utsi / NRK

Sáráhkká lea sámi ipmil, gii várjalii ja veahkehii áhpehemiid ja riegádahttimii.

Eanaš almmáiolbmot

Njukčamánu 8. beaivvi lávdegoddi áiggošii ge geasuhit eanet nuorra nissonolbmuid ráhkadit street-graffiti, go oidnet ahte leat eanas dievddut geat dahket dákkár dáidaga.

Vihtta 15-jahkásaš nuora leat vahkkoloahpas beassan geahččalit street-graffiti dáidaga.

– Graffiti-biras stuorru Romssas, muhto eatnasat leat dievddut. Danin mii fálaimet nieiddaide dán vejolašvuođa, dadjá Astrid Fadnes, njukčamanu 8. beaivvi lávdegotti miellahttu.

Graffiti i forbindelse med kvinnedagen 8. mars

OLE BRUMM: Bargobaji oasálasti sprayestii Ole Brumma vulos oivviid.

Foto: Johan Ante Utsi / NRK

Bálkáerohusat sohkabeliid gaskkas

Triumfa lea ilus go barget dan ovdii ahte oažžut eanet nissonolbmuid dákkár dáidagiid ráhkadit, muhto dadjá ahte bálkáerohusain sohkabeliid gaskkas ferte bargat.

– Mun oainnán bálká lea unnit nissonolbmuin go dievdoolbmuin. Diekko lea mis maid veahá bargu, loktet nissonolbmuid bálkká ja nissonolbmodáiddáriid, dadjá son.

Lager graffiti-vegg i forbindelse med kvinnedagen 8. mars

BARGOBADJI NISSONIIDDA: Dušše nissonolbmot besse searvat bargobadjái.

Foto: Johan Ante Utsi / NRK

Dutkan maid Telemarkforskninga Mari Torvik Heian lea dáhkan, duođašta dan maid Triumfa dadjá.

– Danin go dáidaga iešstivrejupmi ain lea nu gievra, de ii soaitte dásseárvopolitihkka mii muđui doaibmá, doaibmat dáiddasuorggis, čállá Torvik Heian, ja joatká:

– Vuordámuš oažžut dásseárvvu dáiddasuorgái ii berre leat nu allat, go sohkabeliid struktuvrrat ja dáiddasuorggi struktuvrrat leat sitkadat, ja eai soaitte rievdat nu jođánit.