Sámi girječálli Synnøve Persen lohká iežas dolkan Sámi Girječálliid Searvvi bargovugiide. Danne son lea ođđajagimánus jo dieđihan, ahte guođđá searvvi ja buot luohttámušdoaimmaid mat sus ledje doppe.
Rihkkot iežaset mearrádusaid
Persen lea okta dovddumus girječálliin Sámis ja oaččui diibmá Sámiráđi girjjálašvuođabálkkašumi, muhto dál ii loga iežas šat hálidit leat Sámi Girječálliid Searvvi lahttun.
Persen lohká Árdna radio jearahallamis, ahte Sámi Girječálliid Searvvis rihkkot mearrádusaid mat leat dahkkon jahkečoahkkimis, mii lea searvvi alimus orgána. Son almmatge ii hálit almmolaččat muitalit mat dát áššit leat.