Kurt Nilsen lei veaháš maŋŋonan šiehtaduvvon jearahallamii. Diimmu ovdal konseartta, diibmu logis eahkes, lea son aittoládje ollen luossabivddus.
Leavnnja luossa ii dohppen
Dakkár áŋgiris guollebivdi go Kurt Nilsen ii gal fina luossajoga lahka nu ahte ii fina vuokka šlivgesteame juobe moatte háve ge. - Muhto ii dán háve gal darvehan luosa. Áigi bivdit lei beare oanehaš, muitala Kurt Nilsen. Muhto ii son leat šlundon dan dihte gal. Dadjá baicca ahte jus nuppes boahtá Leavnnja guvlui, gal de várre guhkit áiggi bivdui.
Kurt Nilsen lohká váttisin diehtit ahte guhtemuš su lávlagiin lea dat man guldaleaddjit dáppe davvin máhttet. - Sus han leat ollu iešguđetlágan lávlagat, dadjá, ja sávvá ahte olbmot dáppe davvin máhttet eanaš su lávlagiin, vai šattašii albma feasta, reaškkeha.
Willie Nelson Levdnjii?
Eanemus čuojahuvvon Kurt Nilsen lávlla Norgga radios dán áigge lea "Lost highway" man son lávlu ovttas máilmmibeakkán countrylávluin Willie Nelsoniin.
- Gii diehtá, soaitá ahte Nelson livččii vuolgán fárrui Levdnjii, bohkosa Kurt Nilsen. - Ii dien olbmá gal dieđe, go juo lea nu gáiggas ahte suinna gillii ráhkadit lávlaga, ammahal de livčči vel Levdnjii nai vuolgán.
Diibmu 23 bearjadateahkeda álgá konsearta. Media lea ožžon čielga dieđu ahte ii leat lohpi filbmet ja jiena báddet earret go dan golmma vuosttaš lávlagis. Dát lea dábálaš festiválain. Maŋŋálaga čuojaha Kurt Nilsen ovttat nuppi šlágára, "Reality Kicks In", "Push push", "All you have to offer", "Never easy" ja earáid.
Maŋŋel go lea okto čuojahan guokte lávlaga joavkku haga, de hupmagoahtá lávddis ahte su olmmái Willie Nelson livččii várra háliidan su fárrui Gaskaijarockai, muhto ii sáhttán. Muhto Nelson lea sutnje sádden bátti mas lávlu, vai son nai lea máhkaš searvan dán konsertii, leaikkastallá Kurt Nilsen. Ja de gullojit oahpes nuohtat, ja dat lea "Lost highway" mii de čuodjagoahtá. Geahččit biškot ja huiket. Dán sii goit máhttet.
Beannot diimmu lea konsearta bistán, ja Kurt Nilsen giitá ja guođđá lávddi. Olbmot čurvot ahte háliidit gullat eambbo, ja de bohtet Kurt ja su čuojaheaddjit fas lávdái ja olbmot huiket iluin. Kurt Nilsen muitala ahte ii leat goasse leamaš ná guhkkin eret ruovttus ja dovdan iežas nu ruovttos go dán eahkeda.
Ja de hupmá iežas mánnávuođaruovttu guovllu birra, ja ahte ráhkadii lávlaga "My street" gudnin iežas ruovttubáikái. Dat máŋga čuođi olbmo loktejit gieđaid áibmui ja lávlot.
Ja de gullogohtet oahpes álgonuohtat maid oallugat várra leat vuorddašan olles eahkeda. Kurt Nilsen loahpaha konseartta "She's so high" lávlagiin. Ja olbmot lávlot ja huiket.
Go konsearta lea nohkan, gullojit olbmot humadeame gaskaneaset ahte lei duođai buorre konsearta. Ja nu dat lei. Kurt Nilsen geasuhii ja guoimmuhii.
