Bálkkašuvvon Norgga čábbámus geaidnun

– Lea nana vásáhus vuodjit geainnu, erenoamážit go lea fiinna dálki. Dalle vásiha viiddis ja guhkes oidnosiid vuojedettiin. Geaidnu lea huksejuvvon ja heivehuvvon guovllu lundui, ja váldá vuhtii sámi kulturmuittuid maid gávdná duos-dás geaidnoráigge.

Nu čilge bálkkašumi lávdegoddi iežas mearrádusa.

Bálkkašumi namma lea «Vakre vegers pris 2016». Lea Stáhta geaidnodoaimmahat mii lea nammadan lávdegotti mii bálkkaša Finnmárkku fylkkageainnu 98 diimmá čábbámus geaidnun. Lávdegotti miellahtut eai gula geaidnodoaimmahahkii.

– Váttis hukset dákkár geainnu

Dan duolba geaidnogaskka bokte rasttilda duoddara Deanus Davvesiidii. Geaidnu guoskkaha vel Gáŋgaviikka gieldda.

Muohta dadjo leat dat stuorámus hástalus geainnodivššu hárrái, ja dat lea maid sivva ahte geaidnu bálkkašuvvo.

– Danin lea geaidnu loktejuvvon ja huksejuvvon nu ahte biegga galgá bossut muohttaga geainnus eret, iige geainnu ala. Lea váttis hukset geainnuid dán láhkai, čilge bálkkašumi lávdegoddi maiddái.

– Erenoamáš

Guovllugeaidnohoavda Torbjørn Naimak lea ilus.

– Dát lea viehka erenoamáš. Geaidnu lea duođai čába šaddan, ja mu mielas ánssáša geaidnogaska bálkkašumi, dadjá Naimak iFinnmark.no-áviisii.

Gaskal 2010 ja 2015 leat geaidnobargit divvon ja ođasmahttán sullii 30 kilomehtera Idjavuonduottargeainnus.

Bálkkašanlávdegoddi gudnejahttá maiddái Riikageainnu 3 Østerdalena čađa, ja maiddái Carl Berner-johtolatrieggá Oslos (olgguldas čujuhus – teaksta dárogillii).