Háliida politiijaoahpahusa Finnmárkui

– Lea hui álki oažžut alla oahppan ja čeahpes politiijaid bargat Finnmárkkus. Muhto sii eai biso dáppe guhká. Dát buktá eahpesihkkaris dili.

Ollu davvisámi boaittobeal guovlluin rahčet oažžut politiijaid bargui.

Finnmárkku politiijameašttir Ellen Katrine Hætta jáhkká ovtta siva dasa lea ahte ođđa, oahppan politiijat eai leat hárjánan smávva gilážiin bargat.

Son ohcala danin nuorra olbmuid geat juo orrot Finnmárkku boaittobeal báikkiin.

– Jus livččii gáiddusoahppu dáppe davvin, de nagodivččiimet oččodit eanet Finnmárkulaččaid ja sápmelaččaid politiijaohppui.

Finnmárkkus karriearavejolašvuohta

Finnmárkkus eai leat heaittihuvvon dahje sirdojuvvon bargosajit nu mot ovdamearkka dihte Lulli-Norggas. Finnmárkkus lea guhkes gaskkaid geažil bággu atnit bargiid juohke sajis, čilge Hætta.

– Erenoamážit nuorat berrešedje oaidnit ahte Finnmárkkus lea karriearavejolašvuohta, dadjá son.

Politiijaoahppu Sámi allaskuvlii

Norgga Politiija allaskuvlla davimus oahppobáiki lea Bådåddjos. Dasa lassin leat oahppobáikkit Oslos ja Stavernis.

Finnmárkku politiijameašttir Ellen Katrine Hætta ávžžuha Politiija allaskuvlla dál ovttasbargagoahtit muhtun Finnmárkku oahppoásahusain, dego Sámi allaskuvllain Guovdageainnus.

– Dáppe livčče oahppit oassin smávva servodagas ja sii oahpašedje mot bargat fápmu rollas dákkár báikkis.

– Dákkár ovttasbargu attašii erenoamáš gelbbolašvuođa ja maid stuorát ipmárdusa sámi ja finnmárkulaččaid árvvuide.

– Gergosat digaštallat

Sámi allaskuvlla rektor Gunvor Guttorm muitala ahte lea leamaš sáhka ovttasbarggus moadde jagi áigi. Muhto ášši ii leat ovdánan. Son lohká initiatiiva ferte boahtit Politiija allaskuvllas.

– Mii leat gergosat ságastallat. Sáhttá leat vejolaš ovttasbargat nu guhká go sii váldet váldoovddasvástádusa.

– Mis ii leat diekkár gelbbolašvuohta mii politiijaoahpus gáibiduvvo, lohká Guttorm.

Ellen Katrine Hætta dadjá ahte Politiija allaskuvla ii leat doarvái duođalaččat árvvoštallan dán árvalusa. Son lohká dehálažžan ahte sámi politihkkárat loktejit politiijagáiddusoahpu eiseválddiide.

Sámediggeráđđi ja doaibmi sámediggepresideanta Mikkel Eskil Mikkelsen áigu eiseválddiide buktit ovdan Finnmárkku politiijameašttira sávaldaga.

– Mun oainnán movt Bådåddjos nannejedje sámi beliid politiijaallaskuvllas go das lei sáhka, dadjá Mikkelsen.

Ohppet bálvalit olles álbmoga

Bådåddjo Politiija Allaskuvlla rektor Nina Skarpenes čállá e-poasttas NRK:i ahte son mielas searvvašii árvvoštallat ovttasbargovejolašvuođaid. Son doarju Hætta áigumušaid oččodit eanet sámi politiijastudeanttaid.

– Muhto lea dattege nu ahte min studeanttat ohppet fállat politiijabálvalusaid olles álbmogii beroškeahttá das makkár kultuvrii sii gullet.