NRK Meny
Normal

Skuvlačájálmas riidaleami birra

Egil Keskitalo neavttaša Piera, gii liiko givssidit Juhána (Iŋgor Ántte Áilo Gaup). Beaivváš Sámi Teáhtera ođđa skuvlačájálmasas "Láhppon riidaleaddjit" leage givssideapmi guovddáš fáddán.

Egil Keskitalo (Piera) ja Iŋgor Ánte Áilo Gaup (Juhán).
Foto: Siljá Somby

Teáhtera preassadieđáhusa mielde lea "Láhppon riidaleaddjit" guoskahahtti, gelddolaš ja áigeguovdilis muitalus guovtti gándda ja givssideami birra. Bihttá lea heivehuvvon Eva Wikander girjjis "Ensamma krigare". Vuosttaščájálmas lea Guovdageainnus golggotmánu viđát beaivve.

Ii goabbáge oadjebas

Gánddaguovttos govvideaba iežaska ruovttudilálašvuođa, eallindilálašvuođa ja sutno oktovuođa. Oahpásmuvvat sutno siskkáldas máilmmiin, morraša ja bahávuođa čađa, muhto maiddái go ohcaleaba jeđđehusa. Guovddážis guktuid máilmmiin lea oktovuohta, ja eaba goabbáge dovdda oadjebasvuođa ja guktuin leat heajos oktavuođat ollesolbmuide. Pieras lea akvariuma mas lea guolli man namma lea Prinsa Valiánta. Skuvlabottuin láve Juhán čiehkádit hivssegii lohká uvssa duohkái. Linda lea áidna gii diehtá ahte Juhán lea čiehkan njuola ja dávggi iežas lávkii.