ÁRVVOŠTALLAN: Ánne Olli
"Pelle Njoammil" lea gullugovva maid Karen Anne Buljo lea čállán. Dát leat guovtti cd:s, nu leage vejolaš dáid gullat justa dalle go alcces heive.
Gullugova cd-skearruin lea vuogas gullat dáhpáhusain go dáid sáhttá gullat osiid mielde, ollásit bistá gullugova dán guovtti cd:s sullii bealnnot diimmu. Árvvoštalli mielas leat dát buresge gullan veara.
Karen Anne Buljos leat ovdalge gullan, son lea teakstačálli ja lea maid čohkken ja juoigan mearrasámi luđiid cd:ii. Dál son lea čállán gullugova, ja dan lea Davvi Girji ilbmadan guovtti cd.ii.
Gullugovva cd-skearruin
Pelle Njoammil
Pelle Njoammil lea gullugova namma. Namma iešalddis juo muitala ahte gullugovas lea sáhka njoammilis. Muhto rievtti mielde lea dán gullugovas guđajahkásaš nieiddaš, Risten Ingá, geas lea váldorolla. Son dat vásiha imašlas dáhpáhusaid geassebottas.
Olu neavttárat
Gullugovas leat olligat mielde, 12 iešguđetge olbmo neavttastit bihttás, ja dasalassin leat vel vihta máná geat neavttastit oahppiid ja unna stáložiid. Váldorollaneavttar lea Risten Ánne Grønmo, son neavttasta Risten Iŋgga, Niillas Holmbearg neavttasta ges Pelle Njommila. Áhččirolla neavttasta Sverre Porsanger, ádjá rolla ges Nils Utsi, ja soai gal leaba dovddosis neavttárat.
Girjjáš olu govain
Cd-skearruid mielde čuovvu maid girjjáš mas leat olu ivdnás govat, ja das lea maid juohke govvii teaksta. Govaid lea Hege Gschid sárgon.
Vuogas gullat
Oppalaččat lea Karen Anne Buljo gullugovva miellagiddevaš, dát orru leamen dego duohtaeallimis dáhpáhuvvamin dat mii dás gullo, go dás leat olu jienat. Dán gullugovvii liikostin, lea somá dán gullat, danne ávžžuhan duge dán gullat, ja mánáide dáiddašii dát leat vuogasis skeaŋkan. Dasalassin gullugova neavttárat neavttastit nu lunddolaččat, justa nu go olbmot duohtadilis háleštit ja himáhaddet.