NRK Meny
Normal

Gæhttjali aktisasj bágojt gávnnat

Bágo sisadno Svieriga dárogielan la márjju ietjálágásj gå Vuona bielen. Valla gæhttjali dal sámegiellaj aktisasj bágov gávnnat.

Samiskundervisning - illustrasjonsfoto

Julevsámegielan lij ájn moadda hásstalusá majt viertti tjoavddet.

Foto: Simon Piera Paulsen

– Julevsámegielan hæhttu dal muhttijn såhpat.

Dav javllá Sáme Giellagáldo rádediddje julevsáme åssudagán Vuona bielen Svenn-Egil Knutsen Duolljá.

Knutsen Duolljá buojkudahttá dagu dárogielbágujn Vuona bielen "allmenning" gånnå sisadno Svieriga bielen ij la jur sæmmi gå Vuona bielen, valla gåsi de huoman gæhttjali aktisasj julevsámegiela bágov gávnnat mij dasi hiehpá, ja mij sisanov goappátjij biele rijka rájá gåbttjå.

– Gå juo gávnnuji bágo Svieriga ja Vuona bielen gånnå lij sierra sisano, de hæhttu muhttijn såhpat. Mij lip má bájnnidum ietjamij dárogielajs. Muhttijn sjaddá sierra sisadno juska l sæmmi báhko. Máhttá de dajna liehket ietjá sisadno Svieriga bielen gå Vuona bielen.

Sven Egil Knutsen-Duolljá

Svenn-Egil Knutsen Duolljá

Foto: Giellagálldo

Bágojt luojkki

Julevsámegielan dagu ietjá gielajn la luondulasj bágojt ietjá gielajs luojkkat. Ájnas la de julevsámegiela bágov gávnnat mij de gåbttjå goappátjij bielev.

Knutsen Duolljá buojkudahttá måttij bágoj dagu dal Svieriga bielen dárogielbáhko skridsko, mij la vat Vuona dárruj "skøyte" jali Nuortta Vuona giellasuorggáj "sjeise".

– Svieriga bielen de gåhttju dav skrikka. Iv de diede jus dal ållu riekta dav javlav. Ja de Vuona bielen javllap sjiejsa. Ja de sjiejssip, javllá Duolljá-Knutsen.

Moadda giellasuorge

Julevsáme gielan lij aj moadda giellasuorge, ja dajna aj ij la nav álgge gávnnat bágov mij jur hiehpá ja mij gåbttjå divna dájt giellasuorgijt.

– Árvvedav gávnnuji sieradusá. Muhtema javlli tjiehka, svieriga dárogiellaj kök, ja vat muhtema gievkan. Muhtema javlli vat durro.

Ja giellabargge goappátjij bieles rijkarájá lij dán vahkkoloaben seminárraj tjåhkanam Jåhkåmåhken gånnå de dagu dakkár hásstalusájt gæhttjalij tjoavddet.

Lågå aj: Tjåhkani tjoavddusijt julevsámegiela birra gávnatjit