– Ælla má nav ålos mánájs ja nuorajs gudi sámegielav ságasti, ja e ga ållesjattugijs. Danen la nav ájnas æjvvalip arvusmahtátjit nubbe nuppev dåladittjat giellamielav gå ep máhte vuollánit dájna gielajn, vájku muhttijn li hásstalusá. Mij hæhttup tjoavddusijt gávnnat gå la ájnas mijá giella bisoduvvá.
Dav javllá Anne Silja Turi guhti de julevsáme giellakonferánsav la plánimin, konferánssa mij julevsámegielav guovddelij biedjá.
Gåktu åvddålij guovlluj barggat
– Ulmme konferánsajn la giellaberustiddjijt ja sijáv tjoahkkit gudi gielajn barggi. Gejt máhttep guládallat, ja gávnadit gåktu julevsámegielajn barggat åvddålij guovlluj, makkir dárbo li julevsámeguovlon.
Julevsámeguovllo l aj Svieriga bielen, ja dat la aj Anne Silja Turiij ájnas vaj tjåhkani goappásj bieles rájá.
– Ájnas la vaj aktan barggap. Gájka julevsáme aktan gå giella má åvddån gå moattes li aktan.
- Lågå aj:
Oahppamdábe ja plána
Basádismáno 10. ja 11. biejve biejaduvvá julevsámegiella guovddelij. Dajt biejvijt dåladuvvá julevsáme giellakonferánssa julevsáme guovdátjin Árran Divtasvuonan. Da la julevsáme guovdásj Árran ja Divtasvuona suohkan ma de aktan gåhttju giela birra rudnalittjat.
– Dán bále de vuogas giellaoahppamdábe tjalmostahteduvvá, ja aj hásstalusá, máhttelisvuoda ja dåjma giellaano ja giellaplánima birra. Vuostasj biejve tjalmostip giellaoahppamav, sierraláhkáj mánáj gielav, valla aj ållessjattugij gielav. Nuppe biejve li gielladábe ja giellaplána birra. Ja lågådalle li Svieriga ja aj Vuona bieles, javllá Anne Silja Turi.
- Lågå aj: