Kárášjoga joavku Felgen Orkester lea odne almmuhan skearru "Duhát jagi geahčen" mas leat 16 lávlaga. Eanaš lávlagat eai leat almmuhuvvon dahje gullon ovdal.
Petter Tretnes Hansen muitala ahte sii leat ožžon Sámedikkis doarjaga buvttadit CD-skearru ja ahte skearru galggai gárvejuvvot veahá árabut, muhto ledje veahá buvttadanváttisvuođat.
– Muhto min mielas dat heivii lihká bures almmuhit beassážiid, lohká Tretnes Hansen.
Joavku lea juste dál almmuhan CD-hámis lávlagiid, muhto Petter Tretnes Hansen muitala ahte eará lávddiin maid ilbmet dát lávlagat dađistaga.
Čuojahit beassážiid
Felgen Orkester galgá čuojahit Kárášjogas skilleduorastaga ja Guovdageainnus fas beassášlávvordaga.
– Makkár vuordámušat leat beassážiidda?
– Beassážiidda gal leat álo stuorra vuordámušat. Dalle lávejitge hui ollu olbmot čoahkkanit márkaniidda, nu ahte diesa gal leat hui stuorra vuordámušat ja mun sávan ahte dat šaddá nu buorre go dan maid mii sávvat.
Felgen Orkester ii čuojat nu ollu dain ođđa lávlagiin dáid beassážiid.
– Dat lea dan dihte go orrut iešguđetge báikkiin, ja de eat beasa hárjehallat seamma ollu go livččiimet háliidan. Muhto moadde ođđa lávlaga gal soaitit čuojahit konsearttas, lohká Tretnes Hansen.