Ella Marie Hætta Isaksen lea 18 jagi boaris, muhto lea juo geargan neavttašit ja lávlut lávddis badjel logi jagi. Gieskat finadii son doaluin ruovttu gielddas, doppe ollugat rámidedje su, ja dasa lassin oaččui son vel «Norsk Tippinga Drømmestipend».
Erenoamáš beaivi duorastat geassemánu 2. beaivi
Ella Marie ovddeš oahpaheaddji Deanu kulturskuvllas, Ebba Joks, lei ráhkadan govvačájáhusa mas sáhtii oaidnit Ella Marie ieš guđetge agis Deanu kulturskuvllas. Dán čájáhusas ii diehttán Ella Marie maidige, danne hirpmástuvai son sakka go beasai oaidnit daid olu govaid maid Ebba lei heŋgon seinniide.
Dán beaivvi geigii maid Norsk Tipping Ella Mariei «Drømmestipeandda» 10 000 ruvnnu. Ja dán seamma beaivvi lei son maid leamaš njálmmálaš eksámenis Álttá Joatkkaskuvllas, ja das oaččui son buoremus árvosáni, guđeža.
Deanus doaluin beasai son maid lávlut lávddis. Lávllui iežas Sámi Grand Prixa vuoitolávlaga «Luoddaearru» ja vel nuppi lávlaga masa ieš vel čuojahii flygeliin.
Son neavttašii maid, čájehii monologa mainna lihkostuvai bures, go das nagadii čájehit hui lunddolaččat dovdduid.
Deanu sátnejođiheaddji Frank M. Ingilæ giitalii Ella Marie, logai son lea leamaš buorre ambassadevran Detnui. Ella Marie lea áinnat mátkkoštan Deanu Kulturskuvlla mielde maiddái olgoriikkas, nugo Fearasulluin, Islánddas, Suomas ja Duiskkas.
Ja iežas dat gal lohká áigut šaddat neavttárin, iiba sáhtege eará barggu jurddašit. Lávdái son fertešii beassat.