Unjárgga gilisearvvi jođiheaddji, Gunn Britt Retter, dadjá ahte Finnmárkokommišuvnna mearrádus lea seamma go ahte don oamastat iežat viesu, muhto earát galget mearridit movt don dan hálddašat ja geavahat.
– Unjárggas gal imaštit go Finnmárkokommišuvdna mieđiha ahte báikki olbmuin leat geavahanvuoigatvuođat nu movt sii ledje gáibidan, ja seammás de mearridit ahte FeFo daid galgá stivra ja hálddašit, dadjá Gunn Britt Retter.
Son dadjá ahte sii Unjárggas gal vurdet ahte báikki olbmot eanet besset searvat hálddašit ja mearridit iežas luondduvalljodagaid badjel.
Hástalit meahccekommišuvnna
Unjárgga gilisearvvi jođiheaddji, Gunn Britt Retter dadjá ahte álbmot eai dáhtton ahte Finnmárkokommišuvnna mearrádus galggai bissut, ja mearridedje ášši lokte Meahcceduopmostuolu ovdii. Sii háliidit dáinna ládje hástalit Finnmárkokommišuvnna, ja leat danin loktet ášši Meahcceduopmostullui, go danin han dat lea ásahuvvon, deattuha retter.
Vuosttaš diggebeaivi ikte
Ikte lei vuosttaš beaivi duopmostuolus, gos Gilisearvvi bealis besse ovdanbidjat searvvi ákkaid. Odne disdaga de lea Finnmárkkuopmodaga vuoru ovdanbidjat sin oainnuid, ja gaskavahku ges besset vihtaniid vuorru. Retter ii loga sáhttit gal dál vuos einnostit goappá guvlui Meahcceduopmostuollu hállana, go dát han lea dego dábálaš diggi.
Ii earáid ovdii
Gunn Britt Retter deattuha ahte dás ii leat sáhka seamma vuoigatvuođaid birra go mat juo leat boazodoalu ja eanandoalus. Dáin ealáhusain leat sierra guođohanvuoigatvuođat, ja sin gáibádusas lea sáhka eará hálddašeames, murrema, murjema, guolásteami, bivdima jna.
- Guldal Gun Britt Rettera vástádusa dás: