NRK Meny
Normal

Dalle go eŋgelas namma lei "tøffa"

Sámi musihkkajoavkkut Captain Morgan, Blizzard, Sanctuary, Sagittarius ja Intrigue. Die leat aivve eŋgelas namat, muhto manne lei diet nu dábálaš Sámis?

Eŋgelas namat
Foto: Wenche Marie Hætta / NRK

LOGA: DÁ LEAT KÁRÁŠJOT-JOAVKKUT

LOGA: DÁ LEAT GUOVDAGEAIN-JOAVKKUT

Dán áigge leat eanaš sámi musihkkajoavkkuin sámi namat, nu go Adjágas, Jiella, Áigi, Mollet, Duolva Duottar ja nu ain. Muhto nu ii leat álo leamaš, oainnát go ovtta gaska "galge" musihkkajoavkkuin leat aivve eŋgelas namat.

Sámivuohta ii lean nu nanus

Captain Morgan joavkkus lei Egil Keskitalo mielde. Son jáhkká ahte 70- ja 80-logus ii lean sámivuohta nu nanus go dán áigge. - Ja mii han lávlluimet eŋgelasgilli dien áigge. Dalle gal eat láven lávlut sámegillii, muitala Keskitalo.

Sagittarius joavkku Per William Hermansen ja Sanctuary (dál Sančuari) Svein Egil Oskal dadjaba ahte ovdal lei nu ahte namma galggai veahá "tøffa". -Ja mii han galggaimet leat dego dat olgoriikka joavkkut geaidda ieža liikuimet, lohká Hermansen.

Gula go Egil K, Per William H ja Svein Egil O muitalit

Dušše moatti joavkkus lei sámi namma

Hui beakkán sámi joavkkut 70-logus ledje Deatnogátte nuorat, Máze nieiddat ja Ivnniiguin. Dat maid eai nu máŋggas soaitte diehtit, lea ahte Ivnniguin namma lei álggos "Unicorn". Unicorn lea fábel-ealli, heasta mas lea čoarvi gállus. Muhto joavkkus ii lean guhkká diet namma, ovdal de šattai Ivnniiguin.

Fertii molsut sámi nammii

Ofelaš filmma dihte maid šattai ovtta sámi musihkkajoavkkus sámi namma. Blizzard joavkku miellahttu guovttos Ellen ja Magnus Vuolab oaččuiga fálaldaga ráhkadit skearru, muhto Iđut lágádus gáibidii ahte joavkkus ferte leat sámi namma, Blizzard ii lean nu vuogas. Magnus Vuolab muitala ahte fertii oaivvi ruohkkat, gávdnan dihte buori sámi nama iežaska jovkui. Ja de muhtun evttohii nieiddanama Sáve, mii lei Ofelaš filmmas. Ja nu šattai ge diet álkkes ja buorre namman ovddeš Blizzard lahttu guoktái.

Gula manne Blizzard namma jávkkai