Mufi-star lea Finnmárkku iežas golleruvki musihkkii maid vuollel 25-jahkásaš nuorat čuojahit. Nu čállá Musikk i Finnmark neahttasiidduinis dán musihkkagilvvu birra.
Duolva Duottar njunnožis
Guovdageainnu/Máze hiphop-joavku Duolva Duottar lea dál njunnožis gilvvuin go sin lávlla "Niehku" lea eanemus gerddiid čuojahuvvon. 2039 geardde lea lávlla čuojahuvvon dássái ja 1211 olbmo leat jienastan lávlaga.
Nubbin eanemusat čuojahuvvon lea Áltta nieidajoavkku Zymphelia lávlla "Ice". 658 olbmo leat dássái jienastan lávlaga.
Goalmmádin lea sámi hiphop lávlu SlinCraze lávlagiin "Mu niegus". Dát lávlla lea 833 geardde čuojahuvvon ja 322 olbmo leat jienastan dan.
25.000 ruvnnu vuoitái
Dán jagi Mufi-star almmuhuvvo NRK Tromssa ja Finnmárkku njuolggosáddagis skábmamánu 30. beaivve.
Ártista mii oažžu eanemus jienaid vuoitá 25.000 ruvnnu, mii galgá geavahuvvot konsearta- ja studiobuvttadeapmái. Loahpalaš jietnarehkenastin dáhpáhuvvá Nordnytt radiosáddagis diibmu 17.00.