Nils Arne Hætta lohká nuoraid hállat olu dan birra.
– Mun dovddan ahte politiijat leat oaguheamen min, dat orro dego nu ahte Norgga stádas lea ággá heaittihit olles giđđaloddema, dadjá Hætta.
Hætta (17 jagi) lea okta dain gii mánnán juo oahpai árbevirolaš loddema, ja dan son háliida ain dahkat.
– Giđđalodden lea juoga maid lean dahkan juohke giđa, mun lean giđđaloddemin bajásšaddan. Lean áhči mielde álo vánddardan eatnogáttis. Ja giđđalodden lea juoga maid áhči váhnemat leat dahkan, ja mun láven illudit giđđaloddemii, dadjá son.
Giđđalodden lea lohpi vahku juohke giđa Guovdageainnus. Dán jagi besse báhčit 150 čáhcelotti, diibmá lei lohku 300.
Guovdageainnu leansmánni ii loga dárbbašit ballat politiijain jus ii lobihuša.
– Mus ii leat nu olu dadjamuš dasa eará go ahte buohkat geat eai leat rihkkon njuolggadusaid, sii eai dárbbaš ballat. Muhto jus leat bargat doaimmaid ja daguid mat eai leat lobálaččat, de lea lunddolaš ahte ferte veaháš ballat, dadjá Guovdageainnu leansmánni, Klemet Klemetsen.
- Guldal ášši:
