Deanu sátnejođiheaddji ávžžuha Elkema Tana várret ruđaid sierra fondii mii galgá nuppástahttit Juovlavuona dan beaivve go ruvkedoaimmat heaittihuvvojit doppe.
Foto: Eilif Aslaksen / NRKDanin oaivvilda ahte ruvkefitnodagat berrešedje máksit sierra diva sierra fondii mainna sáhttit nuppástuhttit ja ovdánahttit rogganguovllu servvodaga dan beaivve go ruvkedoaimmat heaittihuvvojit.
Deanu sátnejođiheaddji Frank Martin Ingilæ mielas ruvkefitnodagat dál menddo álkit besset jurddašit dušše iežaset tietnasa birra go rogget minerálaid Sámis ja eará guovlluin.
Dan oktavuođas sus earenoamážit leat jurdagis Elkem Tana ruvkefitnodat Juovlavuonas maid kiinnálaččat oamastit, ja mii lea okta dain máilbmi stuorámus kvartsihtta-bolttohagain.
Bidjá eavttuid viddidanplánaide
Ruvkefitnodat mii 40 jagi lea roggan kvartsihta Juovlavuonas, áiggošii viiddidit rogganguovllu gávcci geardde stuorábun. Plána- ja huksenlága vuođul galgá viiddidanplána dohkkehuvvot gielddastivrras.
Sátnejođiheaddji lea mielas viiddideapmái, ja eaktuda ahte dat ii goarit guovllu boazodoalu.
- Loga dárogillii:
- Loga maid:
Dasa lassin Elkem su mielas galggašii rádjat ruđaid sierra fondii.
– Dainna galgá sáhttit nuppástuhttit ja ovdánahttit Juovlavuona servvodaga dan beaivvi go ruvkedoaimmat doppe loahpahuvvojit, sátnejođiheaddji Frank Martin Ingilæ čilge.
– Ii leat áibbas amas jurdda
Elkem Tana beaivválaš jođiheaddji Rune Martinussen ii loga árvalusa leat áibbas amas sutnje.
– Sátnejođiheaddji lea maid ovdal geažuhan dákkár árvalusa. Dattege ii leat goassige gal almmolaččat ságastallan ášši birra minguin. Dieđusge váldit su bures vuostá jus háliida dákkár ságastallama, Martinussen vástida.
– Dárbbašmeahttun
Dattege ii jáhke leat vuogas jus Elkem geatnegahttojuvvo máksit servodatovdánahttindiva.
– Jus dat ásahuvvo, de dat boahtá lassin eará divvagiidda maid juo máksit, ovdamearkka dihtii opmodatdiva maid máksit Finnmárkkuopmodahkii ja diva mii galgá geavahuvvot luonddučorgemiidda, Martinussen čilge.
Su mielas ii obanassii ge leat dárbu sierra servvodatovdánahttindivvagii.
– Ii han mis leat makkárge plána heaittihit doaimma Juovlavuonas, muhto viiddidit. Jus gártet máksit sierra diva, de doaibma ii leat šat seamma gánnáhahtti go dál, son ballá.
