NRK Meny
Normal

Dát girjjáš lea dál guđat heave almmustuvvan

Kárášjoga jahkegirjji doaimmahit vihtta nissona. Girjjis leat olu ságat dološáiggis, earret eará čállet Kárášjoga dearvvasvuođa historjjás.

Kárášjoga jahkegirjji ovdasiidogovva
Foto: Davvi Girji

Sii leat dál guđat geardde čohkken ja čállán muitalusaid Kárášjoga jahkegirjái.

Jahkegirje-doaimmahusa gulahallanolmmoš, Kirsten Pope, muitala iežaset válljet mas sii čállet girjjis.

Dehálažžan lohká leat rádjat ovddešáigge muittuid boahtteáigái, danne galggašii jearahallat boares olbmuid, dan balii go sii vel leat eallimin.

Nissonat čohkkejit ja almmustahttet girjjáža

Jagkegirjedoaimmahusa bargit
Foto: Gudrun E. Eriksen Lindi

Sámi Vuorkádávvira Musea - ja historjjásearvi dat almmustahttá Kárášsjoga jahkegirjji. 2014 Jahkegirjedoaimmahusas leat Ánne Kirstte Máreha Risten, Risten Kemi, BalttoJon Niillasa Olaug, Olaug Larsson, JOvnna Per Piera Astrid, Astrid Johnskareng, Julius Inggá Gudrun, Gudrun Elissa Lindi ja Márjja Per Johanasa Kirste, Kirsten Pope.

Nuorat oahpašedje báikki historjjás

Jahkegirjjis lea olu sáhka ovddeš áiggis, das mo olbmot birgejedje ovddeš áigge. Kirsten Pope oaivvilda nuorat olbmot oahpašedje olu báikki historjjás jos logašedje historjjáid maid girjjis čállet. Dás fuomášivčče earret eará dan ahte ovddeš áigge birgejedje olbmot ruđaid haga. Ruđa eai geavahan ovddešáigge earago vissis gálvvuide, nugo jáffuid oasttit.

(Jearahallan vuolábeal gova)

Kárášjoga jahkegirjji ovdasiidogovva

Rihppaskuvllas beassan 16/2 1913

Foto: Davvi Girji

Govas leat 1913 jagi rihppaskuvlla oahppit. Ovddabealde gurot ravddas Bikk` Ailu/ Aslak Aslaksen Sara, Ole Aslaksen Somby, Rásttoš Juhán / Johan Rasmussen Bær, Elle Jussá / Johannes Johnsen Anti, Jussá Johanas / Johannes Johannesen Anti. Gurot ravddas maŋábealde: Jonne Lásse / Lars Johnsen Gaup, Peanttá Risten / Kirsten Persdatter Lille, Mákke-Gutnil / Gunhild Persdatter Utsi, Dávvet-Pier Risten / Kirsten Persdatter Sara, Álet-Lemet Ánne Biret / Anna Berit Klemetsdatter Somby, Benne-Per Sofe / Sofie Persdatter Sara, Kreittá Biret / Berit Amundsdatter Johnskareng, Jovnna Gutnil / Gunhild Johnsdatter, Máhte Ánne Márjá / Anne Marie Mathisdatter Kildedam, Lindde Márjá / Marie Andersdatter Lindi, Bánáš-Máret Ristin / Kirsten Ravna Aslaksdatter Utsi ja Piera Hánsa / Hans Persen Mosebakken.

Govven: Gudrun Birch-Reichenwald Jensen. SVD-Sámiid Vuorka-Dávviriid vuorká