Dán jagi fáddá Márkomeannu-festiválas lea ahte sii mahkáš lávkejit 100 jagi ovddos guvlui.
Jurdda lea ahte máilbmi lea mahkáš gopmáneame 2118:s, ja festivála lea dat áidna oadjebas sámi báiki go atomasoahti ja koloniseren lea billistan máilmmi.
Festiválajođiheaddji Anne Henriette Reinås Nilut.
Foto: Máret Biret Sárá Oskal / NRK– Álgoálbmogat iežaset árbevirolaš máhtuin ja hutkáivuođain leat čihkosis eallán guhká. Márkomeanu festiválabáiki lea dat áidna báiki gos sápmelaččat besset leat nu ahte eai vuorjašuva, čállá festiválajođiheaddji Anne Henriette Reinås Nilut preassadieđáhusas.
Sámi daft punk
Earret eará čuojahit Felgen Orkester, Resirkulert ja Hanna Nutti festiválas.
– Dál mis lea prográmma maid 2118 ánssáša. Dás mii vilppastat maŋos dološ sáŋgáriiguin, ja geahččat ovddas guvlui ođđa ja boahtteáiggi násttiiguin, lohká Reinås Nilut.
Ja AKKIL-joavku čuojaha nai, ja dán joavkku konseapta lea ahte sin identitehta lea čiegus.
AKKIL.
Foto: Preassagovva– Festiválii lea stuorra ášši go leat fidnen AKKILa festiválii, go artista ii láve muđui čuojahit lávddi alde. Dáhkidat ahte it beasa diehtit gii lávlu, lohka Reinås Nilut.
AKKIL seaguha árbevirolaš luođi ja sámi musihka 80-logu synth-lávlagiiguin. Ja áidna vuohki movt AKKILiin beassá sáhkalaga lea sosiála mediaid bokte, go ii oktage dieđe gii dat čiehkada AKKIL nama duohken.
Dát lea su vuosttaš konsearta maid doallá, muhto lea internehttii almmuhan lávlagiid.
– AKKIL lea ilus beassat čuojahit, ja vel go beassá maŋemus artistan leat olles festiválas, vástida son NRK:i Facebook bokte.
AKKIL šuoŋain Duoddara giron.
Sámi artisttat
Ná čállá Markomeannu preassadieđáhusas artisttaid birra.
- Hanna Nutti: Dán konsearttas besset geahččit vásihit Hanna karrieara rávisolmmožin, dál son eanaš lávlu eŋgelasgillii ja darvviha guldaleddjiid iežas sierralágan jienain.
- Resirkulert: Sii ledje buohkaid njálmmiin jo dalle go almmuhedje "Nederst på lista" 2015:s, ja leat riikkaoasi festiválain čuojahan dan rájes.
- Felgen Orkester: Kárášjohjoavku Felgen Orkester lea šaddan buori sámefeastta definišuvdnan maŋimuš jagiid.
Felgen Orkester.
Foto: Preassagovva
- Absolute Sápmi hits: Dá lea justa maid namma muitala, namalassii sámi hitparádaš. Das leat lávlagat maid dábálaččat it beasa gullat sámi festiválain, muhto mat soitet gullot sámi ovdafeasttain.
- Natalie Carrion: Son lea Upmis eret ja lei okta dain artisttain geat serve Márkomeanu iežas taleanta-sessionsii 2016:s. Guokte jagi maŋŋá lea son huksen buori karriearavuođu Ruoŧa bealde, earret eará hitlávlagiin "Uppför fjäll".
Natalie Carrion.
Foto: Briana Carrion // Lifetales.se - Intrigue: Dát joavku, mas Kai Somby lea vokalistan, almmuhii vuosttaš albuma 1994:s. Jagi 2118 lea vuosttaš geardi go joavku galleda Márkomeanu, nu ahte dát konsearta lea duođaid historjjálaš dáhpáhus.
- Tundra Electro: Tundra Electro lea Ingá-Máret Gaup Juuso joavku. Joavku ovttastahttá Juuso luđiid, elektronihka, improvisašuvnna ja klassihkalaš indialaš musihka.
- AKKIL: Dat lea Sámi iežas Daft Punk - artista mii čuojaha anonyman ja ii báljo oba doalage konsearttaid. Neahtas ellet šuoŋat dego"Duoddara giron"ja "Davás".
Márkomeannu 2118 lágiduvvo suoidnemánu 26.-29. beivviid.
