Otne rahppojedje máilmmi stuorámus biebmo- ja eanandoallomeassut «Grüne Woche» Duiskka oaivegávpogis, Berlinas. Meassut lea dehálaš arena ovddidan dihte eanandoalu, biepmo- ja mátkeealáhusa politihka ja váikkuhangaskaomiid.
Eanandoallo- ja biebmoministtar Jon Georg Dale lea maiddái dán jagi bovden ealáhusáirrasgotti mielde Norgga čájáhuslávddi rahpamii «Grüne Woches», nu maiddái boazoealáhusa man ee. Ellinor Guttorm Utsi ovddasta. Su mielas lea máilbme dehálaš ahte boazoealáhusa buktagat maid bohtet ovdan dákkáraš meassuin.
– Ahte mii leat oassin dákkár stuorra áirrasgottis ja loktejuvvot maiddái sierra čállosis, maid ráđđehus lea dál ovddidan, lea hirbmat buorre. Lea maid máilbmi vuogas ahte beassat čohkkát birra beavddi ja ságastallat ee. sihke ministariin ja eanandoallodepartemeantta olbmuiguin. Nu mun in sáhte gal láitit, lohká Guttorm Utsi.
Norgga ealáhusáirrasgoddi lea bovdejuvvon dohko áhpásmahttit riikkaidgaskasaš ovttasbarggu ja movttiidahttit iešguđetge ealáhusa ođasmahttit buktagiid. Dán jagi leat 77 iešguđegelágán Norgga buvttadeaddji ja fitnodaga searvan máilmmi stuorámus biebmo- ja geavaheaddjimeassuide, mat leat Berlinas. Ja doaivva lea ahte Norga galgá šaddat riikkaidgaskasaš buorrindohkkehuvvon biebmonašuvdnan.
– Mii seavvilat máilmmi, boahttet Davás
Čorgašnjárgga badjenissonis Ellinor Guttorm Utsis lea doaivva ahte bohccobiergu galgá šaddat juoidá maid olbmot jearahit boradanbáikkiin go bohtet Norgii. Ja doaivu ahte boahtteáiggis galgá bohccobiergu leat fidnemis boradanbáikkiin.
– Dat galggašii láhččojuvvot dan láhkái iešguđetge fitnodagaid, sihke turisttaealáhusa ja bohccobierggu buvttadeddjiid bokte. Mii vuovdit dán dego buktaga máilbmái ahte galget boahttit Davás, Norgii, borrat dan buot dearvvašleamos bierggu mii gávdnoš, čilge son.
– Makkár márkan vejolašvuođaid oainnát don boahtteáiggis?
– Dat lea vejolašvuođat vaikko man olu, dat lea mo mii láhččit dilálašvuođa. Mii dárbbašat vel eambo čielga sámi fitnodagaid, main lea fálaldagat turisttafitnodagaide ja main lea boradanbáikkit. Dat lea beare iežamet višu duohken, maid mii gillet ja nákcet hukset, vástida Davvi Siida mátkeealáhusfitnodat eaiggát ja badjenisu Ellinor Guttorm Utsi.