Evttohasat geasi sámediggeválggaide válbmasat
Suoma sámedikki válgalávdegoddi lea almmustahttán geasi sámediggeválggaid evttohasaid. Mielde leat oktiibuot 35 evttohasa. Dat lea okta eambbo go čakčat, dán čállá Yle Sápmi.
Evttohasain leat viđas geat eai lean mielde čavčča válggain. Sii leat Inka Kangasniemi Anáris, Kari Kyrö Anáris, Paavo Riihitammela Kirkkonummis, Marko Tervaniemi Anáris ja Antti Sujala Ohcejogas.
Čavčča evttohasain leat njealjis geat eai leat šat evttohassan. Sii leat Anni-Sofia Niittyvuopio Ohcejogas, Margareetta Suoninen Anáris, Sámmol Lukkari Ohcejogas ja várrelahttun čakčat válljejuvvon Pentti Pieski Ohcejogas.
Suoma sámedikkis čađahuvvot válggat ođđasit geasset danin go Suoma alimus hálddahusriekti lea mearridan dan. Sivvan dasa lea go Sámedikki válgalávdegoddi ii lean váldán olbmuid jienastuslohkui geaid alimus hálddahusriekti meidne ahte galggašit leahkit jienastuslogus. Dát olbmot eai beassan danin jienastit dahje searvat evttohassan čavčča válggaide. Válggat lágiduvvojit ođđasit vai dát 65 nai besset jienastit.