NRK Meny
Normal

Speallanfitnodagas ii leat jáhku Ann-Marii

Speallanfitnodat Bettson navdá sierranas stiilla ja alla beakkálmasfáktora mearridit gii vuoitá dán jagi Norgga Melodi Grand Prix. Ftinodat lea bidjan alla oddsaid dasa, ahte Ann-Mari Andersen galggašii vuoitit.

Ann-Mari Andersen
Foto: Sara Victoria Andersen

Otne eahkedis lea vuosttaš oassefinála dán jagi Norgga Melodi Grand Prix gilvvuin. Dás lea earret eará guovdageaidnolaš Ann-Mari Andersen mielde.

Bettson speallanfitnodagas ii leat almmatge Andersen dat stuorámus fávorihtta vuoitit olles gilvvu. Dán fitnodagas oainnat navdet ahte musihkalaš kvalitehtas lea rievtti mielde unnán mearkkašupmi dasa gii de loahpas vuoitá.

Ferte leat earálágán

Lene Alexandra
Foto: Fredrik Arff/Dinamo / NRK

- Maŋimuš jagiid áigge leat masá álo ártisttat main lea sierranas stiila ja alla beakkálmasfáktor vuoitán Melodi Grand Prix. Dan čállá Bettson vuovdalanhoavda, Hans Martin Nakkim, preassadieđáhusastis.

Nakkim árvvoštallama mielde lea dán jagi gilvvuin erenoamážit dánsomusihkkajoavkkus Ole Ivars:s ja glamourmálles Lene Alexandras dat mii galgá vai vuoittášii dáid gilvvuid. Sii leat earálágánat go dat earát.

Dát leage vuođđun dasa go fitnodat de lea bidjan oddsa dán jagi Melodi Grand Prix gilvvuide.

Gula Lene Alexandra "Sillycone Valley"

Ole Ivars vuoitá

Ole Ivars
Foto: Fredrik Arff/Dinamo / NRK

Bettson mielde lea Ole Ivars stuorámus fávorihtta. Oddsa lea 4.50. Dát mearkkaša ahte jus joavku duođaid vuoittášii, de oaččošit ruovttoluotta bealviđat geardde dan sumis maid bijat dasa ahte justa dát joavku galggašii vuoitit.

Lene Alexandra oddsa lea 5.50. Podium 7.0. King of Trolls 8.0.

Ann-Mari Andersen lea easkka guoktenuppelogádin. Muhto jus son duođaid vuoittášii olles dán jagi gilvvu, de oaččošit ruovttoluotta 21 geardde dan ruđas maid leat bidjan dasa ahte justa son vuoittášii.

Unnimus jáhku Bettson fitnodagas lea Michelle:i ja Sven Garås:i. Dáin lea oddsa 80.0.

Gula Ole Ivars "Som i himmelen"

Nuppi fitnodagas stuorra jáhku

Ann-Mari Andersen
Foto: Sara Victoria Andersen

Betsafe.com speallanfitnodagas lea stuorra jáhku dasa, ahte Andersen sáhtášii beassat viidáset finálii. Sutnje leat bidjan dušše sullii beali stuorát oddsa go dat mii lea otná eahkeda stuorámus fávorihtas, Nicholas Carlie. Carlie oddsa lea 1.55. Andersen oddsa lea gis 3.20 ja son lea okta dain gean ala eanemusat leat bidjan ruđaset Betsafe.com speallamis.

Norgga Grand Prix klubbas oaivvildit, ahte Ann-Mari Andersen lávlla lea sihke buorre ja erenoamáš. Danne das galggašii leat buorre doaivva vuoitit olles gilvvu.

Gula Ann-Mari Andersen lávlaga