Dieđátgo 2010-gilvvuid 1. álgovuorru lei hui gelddolaš. Anára badjedási oahppit ledje ovddabealde golbma vuosttas gažaldaga. Sis manai goitge juoga boastut ja viđát gažaldagas Máze nuoraidskuvlla oahppit jukse Anára.
Máze nuoraidskuvlla oahppit hálddašedje sámepolitihkka buorebut, go Suoma beale oahppit, ja vuite 1. álgovuorru beallečuoggáin. Dát mearkkaša dan, ahte Máze beassá viidásut gaskavurrui.
Dieđátgo 2010-gilvvuid 1. álgovuorru sáddejuvvui NRK Sámi Radios 21.01.2010 d. 16.30.
GULDAL:
Anára badjedási Dieđátgo-joavku:
- 15-jahkásaš Anniina Kitti, guhte vázzá 9. luohkás
- 12-jahkásaš Irina Saijets, guhte vázzá 7. luohkás
- 15-jahkásaš Susanna Valkeapää, guhte vázzá 9. luohkás
Máze nuoraidskuvlla Dieđátgo-joavku:
- 13-jahkásaš Ellen Oline Eira, guhte vázzá 8. luohkás
- 15-jahkásaš Piera J. Eira, guhte vázzá 10. luohkás
- 13-jahkásaš Stine Marje Vars, guhte vázzá 8. luohkás
Gažaldagat ja rivttes vástádusat
1. Rehket
- Jokŋakilo máksá 13 ruvnnu. Galle kilo oažžubehtet joŋaid 420 ruvnnuin? 32 kg.
- Galle proseantta lea lohku 25 logus 200? 12,5 proseantta.
2. Musihkka
- Man birra čuovvovaš musihkkabihtáin lea sáhka? Dien bihtás lea sáhka bohccuid birra. Biegga dolvvoda bohccuid. Dies gulaimet Áillohačča “Sámi eatnama duoddariid”, Intrique-Áillohaš, Sofia Jannok-Sámi eatnan duoddariid ja Lars Ánte Kuhmunen-Sámi eatnan duoddariid.
- Čuovvovaččat gullabehtet njeallje lávlaga. Guldalehket dárkilit! Mii diein lávlagiin lea oktasaš? Álggos gulaimet Mia Rasmus Sielu Dolla, ja de Mari Boine Dolla, dasto Áŋŋelit Dollabuollin, ja loahpas vel Nico Buljo Dolla. Diein lávlagiin lea sáhka dola birra.
3. Sámegiella
- Biddjet čuovvovaš cealkagiid máŋggaidlohkui: Geasa diet girji gullá? Nieida vajálduhtii iežas girjji. Rivttes vástádusat: Geaidda diet girjjit gullet? Nieiddat vajálduhtte iežaset girjjiid.
- Sámegielas muhtun verbálat ja predikatiivvat gáibidit objeavtta vissis kásushámis. Dát gohčoduvvo giellaoahpas rekšuvdnan. Makkár kasusa gáibida liikot-vearba, naba ráhkistit-vearba? Dego omd. Mun liikon + guoli Mun ráhkistan + eadni. Rivttes vástádusat: liikot-vearba gáibida illatiivva, dego ovdamearkan: Mun liikon guollái. Vearba ráhkistit gáibida akkusatiivva , dego ovdamearkan: Mun ráhkistan eatni.
4. Historjá
- Manin guovvamánu 6. beaivi lea Sámi Álbmotbeaivi? 15. Sámekonfereansa Helssegis geassemánus 1992:s mearridii, ahte sámi álbmotbeaivi lea guovvamánu 6. beaivi. Duogáš dása lei, ahte vuosttas sámiid oktasaš čoahkkin dollojuvvui 6.2.1917 Troanddimis.
- Pedar Jalvi lei vuosttas Suoma beale sámigirječálli. Guđe jagi son almmustahtii Muohtačalmmit-girjjáža? 1915:s.
5. Feara mii
- Dán dálvve lágidit vuosttas geardde Sámi Ski Race-čuoigamiid. Gos gosa ja man guhki dát čuoigamat leat? Heahtás Guovdageidnui. Ovcci miilla guhkkosaš.
- Sámi spábbačiekčanpresideantta, Mikkel Isak Eira, muitalii ovdalaš juovllaid min ođđasiin, ahte fertejit váldit sihkarvuođa duođaš, ovdalgo mearredit, searvágo Sámi riikkajoavku Viva World Cup-spábbačiekčamiidda guovtte jagi geažes. Gos Viva World Cup-spábbačiekčamat lágiduvvojit 2012:s? Kurdistanas, Davvi-Irakas.
6. Sámepolitihkka
- Geat leat Norgga, Ruoŧa ja Suoma Sámedikkiid várrepresideanttat? Norgga Sámedikki várrepresideanta lea Laila Susanne Vars, Ruoŧa Sámedikki stivrra várreságadoalli lea Håkan Jonsson ja Irja-Seurujärvi Kari lea Suoma Sámedikki 1. várreságajođiheaddji.
- Galle áirasa leat Suoma Sámedikkis, naba Norgga Sámedikkis? Suoma Sámedikkis leat 21 áirasa, Norgga Sámedikkisges 39.