Martin Buljo, Ánne Biret Pulk, Elle Martine Eira ja várrelahttu Márja Sofe H. Hætta illudedje sakka, go vuite dán jagi Dieđátgo-gilvvuid.
Guovdageainnu nuoraidskuvlla oahppit gilvvohalle finálas Heahtá- ja Gáregasnjárgga vuođđoskuvllaid oahppiid vuostá.
– Dat lea hui somá leahkit olles Sámi čeahpimus oahppi, ilolaš Ánne Biret Pulk dovddahii dássidis finála maŋŋá.
Guovdageainnu oahppit rámidedje sakka iežaset oahpaheaddjiid.
– Sis lea hui buorre oahpahus, Martin Buljo čilgii.
GULDAL:
GEAHČA:
Dássidis gilvu
Skuvllat ledje dássálagaid nubbin maŋimuš gažaldaga rádjai. Guovdageaidnu lei dušše beallečuoggá ovddabealde Gáregasnjárgga vuođđoskuvlla oahppiid, geat vuite diibmá Dieđátgo-gilvvuid.
Guovdageainnu oahppit dihte goitge eanet valáštallamis ja vuite guvttiin čuoggáin Gáregasnjárgga oahppiid. Heahtá skuvlla oahppit ožžo oktiibuot ovcci čuoggá.
– Loahpas ledje moadde váttes gažaldaga ja danin sii vuoittahalle. Ná čilgii Gáregasnjárgga oahppi Matias West finála maŋŋá.
Guovdageainnu nuoraidskuvlla oahppit ožžo digitála videokamera ja 750 ruvnnu guhtege. Gáregasnjárgga oahppit šadde nubbin ja ožžo digitála kamera.
Heahtá skuvlla oahppitges šaddá goalmmádis ja ožžo vehá unnebuš kamera iežaset skuvlii.
Heahtá skuvlla Dieđátgo-joavku:
14-jahkásaš Heaika Näkkäläjärvi, guhte vázzá 8. luohkás
15-jahkásaš Iina Marja Juuso, guhte vázzá 9. luohkás
15-jahkásaš Johan Duommá Magga, guhte vázzá 9. luohkás
Gáregasnjárgga badjedási Dieđátgo-joavku:
13-jahkásaš Laura Pieski, guhte vázzá 7. luohkás
15-jahkásaš Nora Pieski, guhte vázzá 9. luohkás
15-jahkásaš Matias West, guhte vázzá 9. luohkás
Guovdageainnu nuoraidskuvlla Dieđátgo-joavku:
15-jahkásaš Anne Biret Pulk, guhte vázzá 9. luohkás
13-jahkásaš Elle Martine Eira, guhte vázzá 8. luohkás|
15-jahkásaš Martin Buljo, guhte vázzá 10. luohkás