Heahtá skuvlla oahppit vuite 4. gaskavuoru 4,5 čuoggáin. Gilvvuid maŋŋá Suoma beale oahppiin ledje buotit dovddut.
– Somá dieđusge, 15-jahkásaš Iina Marja Juuso muitalii ilus gilvvuid maŋŋá.
Ovdalaš gilvvuid Heahtá oahppit lohke iežaset vuoitit Dieđátgo-gilvvuid dán jagi. Dát bođii ovdan sin divttas Min jagi áiggit.
GULDAL:
Heahtá skuvlla Dieđátgo-joavkku gándda guovttos eaba lean ovttaoaivilis das, ledjego gažaldagat váddásat, vai eai.
– Na mat nu ledje, Johan Duommá Magga oaivvildii.
– Eai lean ollege váddásat, 14-jahkásaš Heaika Näkkäläjärvi muitalii.
Suoma beale oahppit lohket iežaset ráhkkanit gaskavurrui seamma láhkai go álgovurrui, namalassii lohkat ja geahččat sámi tv-ođđasiid.
– Váttes gažaldagat
Sirpmá skuvlla oahppit ožžo 4 čuoggá ja ledje duhtavačča dasa, ahte besse viidásut gaskavurrui.
Álgovuoru gažaldagat ledje goitge oahppiid mielas váddásat ja gilvvuid maŋŋá sii dovddahedje, ahte eai lean iežaset mielas doarvái bures ráhkkanan gilvvuide.
– Dat ledje oalle dohkálaččat, muhto sii eai lean lohkan daid rivttes áššiid daid gažaldagaid ektui. Ná muitaleigga 13-jahkásaš Ánne Márget Somby ja 15-jahkásaš Sara Márjá Utsi.
– Sii eai ráhkkanan doarvái
Ovdal gilvvuid Kárášjoga oahppit lohpidedje juoigat, jus besset gaskavurrui. Kárášjoga nuoraidskuvlla oahppit ožžo goitge dušše 3,5 čuoggá, eaige beassan viidásut gaskavurrui.
Oahppit muitaledje iežaset ráhkkanišgoahtán easka beaivvi ovdal gilvvuid. Dát ii lean doarvái. Oahppiid mielas gažaldagat eai lean váddását, muhto dovddahedje ahte sii eai lean doárvái bures ráhkkanan.
– Eai lean váddá gal, muhto sii veháš feilejedje vuosttas gažaldagas, 15-jahkásaš Nils Kaj Ánde Anti čilgii 4. álgovuoru maŋŋá.
Dieđátgo 2010-gilvvuid 4. álgovuorru sáddejuvvui NRK Sámi Radios 11.2.2010 d.16.30.
GULDAL:
Heahtá skuvlla Dieđátgo-joavku:
- 14-jahkásaš Heaika Näkkäläjärvi, guhte vázzá 8. luohkás
- 15-jahkásaš Iina Marja Juuso, guhte vázzá 9. luohkás
- 15-jahkásaš Johan Duommá Magga, guhte vázzá 9. luohkás
Kárášjoga nuoraidskuvlla Dieđátgo-joavku:
- 15-jahkásaš Nils Kaj Ánde Anti, guhte vázzá 10. luohkás
- 14-jahkásaš Seline Boine, guhte vázzá 9. luohkás
- 15-jahkásaš Stine Marie Høgden, guhte vázzá 10. luohkás
Sirpmá skuvlla Dieđátgo-joavku:
- 13-jahkásaš Ánne Márget Somby, guhte vázzá 8. luohkás
- 15-jahkásaš Jens Heaika Varsi Solbakk, guhte vázzá 9. luohkás
- 15-jahkásaš Sara Márjá Utsi, guhte vázzá 10. luohkás
Gažaldagat
1.Rehket
- Galle geardásaš miljovdna lea čuođi ektui?
- Ealligovva, mii bistá 123 minuvtta, álgá beal čiežas. Galli áigge ealligovva nohká?
2. Musihkka
- Čuovvovažžan gullabehtet guokte dovddus artistta. Geat soai leaba ja makkár lávlagiin lea sáhka? Fertebehket diehttit unnimusat nuppi artistta ja lávlaga dahje guktuid artisttaid ja guktuid lávlagiid, ovdalgo oažžubehket beallečuoggá.
- Čuovvovaččat gullabehket vihtta iešguđetge artistta. Mii dáin artisttain lea oktasaš?
3. Sámegiella
- Biddjet čuovvovaš cealkagiid attribuhttahámiide. Diet olmmoš lea gielaheapmi. Olmmoš ii oahpa čálekeahttá. Nubbi cealkka ferte leat ollásit riekta, ovdalgo oažžubehket beallečuoggá.
- Adjektiivvat čilgejit mo dahje makkár juoga lea. Adjektiivvain leat golbma veardidanhámi. Guđe láhkai čuovvovaš sánit sodjet komparatiivvas ja superlatiivvas lihkolaš ja boaris? Dás fertebehket máhttit sojahit unnimusat nuppi sáni sihke komparatiivvas ja superlatiivvas, ovdalgo oažžubehket beallečuoggá.
4.Osku
- Guđe oskkuide gullet čuovvovas olbmot: Muhammad ja Siddhartha Gautama? Dás fertebehket diehttit nuppi, ovdalgo oažžubehket beallečuoggá.
- Mat leat Kiinná árbevirolaš oskkut? Golmma oskkus fertebehket diehttit unnimusat guokte, ovdalgo oažžubehket beallečuoggá.
5. Feara mii
- Guđe filbma vuittii diibmá Sámi Filbmafestivála Čorvoš-bálkkašumi? Suddenly Sami, Guovdageainnu stuimmit vai Ođđa dálkkiid gillájeaddjit?
- Gallát háve Sámi Filbmafestivála geigii Čorvoš bálkkašumi diibmá?
6. Valáštallan
- Sápmi vuittii vuosttas Viva World Cup spábbačiekčamiid, mat lágiduvvojedje Occitanias, Frankriikkas. Diibmá Sápmi šattai goalmmádin, muhto guđe riikkas dát čiekčamat lágiduvvojedje?
- Gallii Viva World Cup spábbačiekčamat leat lágiduvvon?