Boahtte vahkkus čoahkkanit girječállit iešguđet guovlluin Davvi Norggas ja Davvi guovlluin Girkonjárgii Finnmárkku fylkkagirjerádjosa girjjálašvuođa doaluide.
– Dokko servet maid sámi girječállit, muitala Finnmárkku fylkkagirjerádjosa ráđđeaddi Sunniva Knutsen.
Doaluid gohčodit Finnmark Internasjonale Litteraturfestivalan, sámegillii sáhtášii dán dadjat Finnmárkku Riikkaidgaskasaš girjjálašvuođa festiválan. Gaskavahkku dat álget doalut mat bistet lávvardahkii.
Háliidit boktit lohkanmovtta
Áigumuš dáinna festiválain lea boktit olbmuid beroštišgoahtit eanet girjjálašvuođas ja movttiidahttit sin lohkat eanet .
Dál lágida Finnmárkku fylkkagirjerájus dáid doaluid njealját háve. 2010:s lágidii Finnmárkku fylkkagirjerájus vuosttaš girjjálašvuođafestivála Finnmárkkus, guokte jagi maŋŋil 2012:s lágiduvvui feativála Girkonjárggas, 2014:s ges Álttás ja dál fas Girkonjárggas.
Girjerádjosiidda ođđa doaibmanjuolggadusat
Sunniva Knutsen muitala Norggas lágiduvvojit 60 girjjálašvuođafestivála jahkásaččat. Nu leage dát lágideamit šaddan dáhpin juo Norggas.
Girjerádjosiidda leat ráhkadan ođđa njuolggadusaid, ja dát njuolggadusat gáibidit ahte girjerádjosat lágidit iešguđet lagan doaluid lassin girjeluoikamii.
Sámi girječállit maid servet dáidda doaluide
Issát Sámmul Heatta galgá spáiddárvázzimis maid lohkat divttaidis. Lill Tove Fredriksen ges logaldallá Jovnna Ándde Vestas, Marry Ailonieida Sombys lea ges máinnasboddu sihke dáro- ja sámegillii, ja deaivvada maid Mátta-Várjjaga skuvllaohppiiguin geain sámegiella lea skuvllas. Sigbjørn Skåden ges lágida čállinkurssa.
Finnmárkku olbmuid mentalitehtta lea festivála váldo fáddá
Sámi girječálli Rauni Magga Lukkari searvá ságastallamii mas rádjaolbmuid mentalitehtas ságastallet.
Mentalitehta leage dán girjjálašvuođafestivála váldo fáddán.
Sámi girječálliidsearvi dat mearridii dán fáttá danne go Finnmárkkus orrot máŋgga kultuvrrat olbmot, nugo sápmelaččat, kveanat, ruoššat, suopmelaččat ja vel olbmot geat leat boahtán guhkkin olgoriikkas Norgii.
Dán ságastallamii searva maid Finnmárkku fylkkadoavttir Eivind Mork ja sámi girjjálašvuođa vuosttašamanuensa Lill Tove Fredriksen. Sámi girječálliidseavvi miellahttu Irene Larsen dat jođiha ságastallama.