Ávžžuha ásahit eamiálbmotdepartemeantta Norgii
UiT riektedieđaprofessor Øyvind Ravna ávžžuha Norgga čuovvut Brasila ovdamearkka ja ásahit eamiálbmotdepartemeantta.
– Brasilas leat joavdan guhkkelii go leat ásahan sierra departemeantta eamiálbmotáššiide. Norggas lea stáhtaráđđi, dadjá Ravna.
Brasila presideanta Lula da Silva nammadii álgoálbmotministtar ja ásahii eamiálbmotdepartemeantta ođđajagimánus.
Riektedieđaprofessora Ravna mielas ii leat doarvái ahte Norggas lea sámi stáhtaráđđi ráđđehusas ja Sámediggi.
– Jáhkán ahte eamiálbmotministtaris livččii stuorát váikkuhanváldi ja ovddidan eanet dieđuid sámi dilálašvuođain. Jos sápmelaččain livččii leat stuorát ovddasteapmi ráđđehusas, de livččii sáhttit garvit dakkár áššiid nu mo Fovsen-ášši ovdamearkka dihte, ákkastallá Ravna.
Sámediggepresideanta Silje Karine Muotka ii jáhke Norgga dárbbašit eamiálbmotdepartemeantta. Son baicce oaivvilda ahte berre nanosmahttit Sámedikki.
– Dainna lágiin olahivččiimet mihttu sámiid iešstivrejupmái. Sámediggi han lea sápmelaččaid álbmotválljen orgána ja eiseváldi, dadjá Muotka.
Muotka muittuha ahte Norggas leat eará dilis go Brasilas.
– Hástalusat leat stuorát Brasilas go Norggas. Dasa lassin leat eanet eamiálbmotjoavkkut Brasilas. Norggas leat sápmelaččat dat áidna eamiálbmotjoavkku, loahpaha Muotka.