Historjá čállo
Lula da Silva lea Brasila ođđa presideanta. Ja son dahká juoga maid ii oktage ovdal leat dahkan.
Son nammadii álgoálbmotministara.

Sônia galggai jávkaduvvot – dál lea son ministtar

Sônia Bone de Souza Silva Santos dat lea su olles namma. Muhto gohčoduvvo Sônia Guajajaran. Lea riegádan njukčamánu 6. beaivve 1974:s.

Son gullá guajajara-eamiálbmogii, mii lea Arariboia álgoálbmotguovllus, Brasila nuortadavvi guovllus.

Sônia lea guhká áŋgiruššan Brasila álgoálbmogiid vuoigatvuođaid ovddas.

Riikkas leat dál birrasii 900.000 olbmo, geat gullet muhtin álbmogii riikka 230 eamiálbmogis.

Olles Brasilas leat 213 miljon ássi.

Olu álgoálbmogat ellet Amazona viiddis arvevuvddiin.

Muhto dohko bahkkejit maid earát.

Danin leat vuovddit cahkkehuvvon ja boldojuvvon.

Guajajara álbmot lea viggan fáktet ja várjalit vuvddiid.

Paulo Paulino Guajara lei okta, guhte vikkai bissehit vuovdečuollamiid.

Skábmamánus 2019:s báhččui Paulo.

Vuovdečuollit, geain ii lean rievtti mielde lohpi čuollat, godde su.

Álgoálbmogat čuožžiledje eiseválddiid vuostá ja čađahedje miellačájehemiid.

Sii gárte oktii njunnálaga Brasila politiijaguin.

Lea áigi bissehit álbmotgoddima!
Sonia Guajajara, Twitteris

Maŋŋá go dát almmái, Jair Bolsonaro, válljejuvvui Brasila presideantan ođđajagimánu 1. beaivve 2019, de šattai Amazonasa álgoálbmogiid dilli vel vearrát.

Bolsonaro dohkkehii sihke vuovdecahkkehemiid ja vel eanet ruvkedoaimmaid.

Álgoálbmogat ellet ain reserváhtain, dego livčče lean eallit zoologolaš gárddis.
Jair Bolsonaro
Guovllus leat stuorra riggodagat, mat leat addon álgoálbmogiidda olgoriikkaid vehkiin.
Jair Bolsonaro

Bolsonaro áigumuš lei jávkadit álgoálbmogiid arvevuvddiin.

Muhto Sônia Guajajara ii vuollánan.

Fárrolaga eará njunnošiiguin, galledii son Norgga 2019:s.

Son muitalii álgoálbmogiid vártnuhis dili birra.

Ja dál lea Norgga dálkkádat- ja birasministtar Espen Barth Eide lohpidan Lula da Silvai ruđaid gádjun dihtii Brasila arvevuvddiid.

Dál beassá Sônia Guajajara ieš presideantta beavdái.