Guovdageainnu ártistta Annbjørg Susanna Hætta lea okta sis gii oaččui doarjaga Sámi kulturfoanddas dán juolludanvuorus.
100.000 ruvnnuin lea álgu buvttadišgoahtit pop-CDa, ja dál lea Hætta ilus go eallima niehku ollášuvvá. Son lea válljen Bernt Mikkel Haglunda buvttadeaddjn.
Annbjørg Susanna Hætta bođii oidnosii sámi musihkkamáilbmái Sámi Grand Prix bokte. Doppe lea lávlon sihke okto ja earáid fárus. Namuhit lávlagiid dego "Girdilan", "Cummá" ja "Mun dárbbašan du".
-Dá leat lávlagat maid earát leat čállán, ja mun lean dušše lávlon daid. Mu cdas galget leat lávlagat maid ieš lean čállán, ja dat šaddá somá gullat movt olbmot dan vuosttáiváldet, dadjá Hætta.