Agnete muitala aviisii ahte son lea viggan «gávdnat iežas». Su mielas lea Saba goargu hui fiinna sámi goargu, ja son lea rábmái dainna.
– Dát goargu lei mu áhku, ja dat han lea measta jávkan, čilge Agnete iežas ođđa goarggu birra.
Dál duostá fas
Agnete Saba lea ollu gerddiid muitalan rahpasit iežas psyhkalaš váttisvuođaid birra ovdal go searvvai «Icebreaker» lávlagiin Eurovision musihkkagilvvuide 2016:s (ESC).
Maŋŋel dan jaskkodii. Agnete ii searvan masage. Unnán gullui su birra, muhto fanssat gal leat vuordán su.
Agnete lea álo rahpasit muitalan iežas sámivuođa birra. Dá leat su filbmeme Unjárggas Eurovision Song Contest videoi, mii galggai čájehit su olles Eurohpai.
Foto: Carl-Gøran Larsson / NRKNjeallje jagi leat gollan, ja dál lea dán nuorra artisttas fas miella geahččalit juoidá ođđa.
– Mun fertejin gal veahá smiehttat dán prográmma birra, ovdal go vástidin juo, dadjá Agnete Dagbladet:ii. Son gávnnahii ahte ii leat go njuiket dasa, vaikko leat ge guhkes beaivvit ja ollu bargu go báddejit Vestre Kjærnes dálus.
– Šaddá hui somá gullat makkár eallin dain eará artisttain lea leamaš dássážii, dadjá Agnete.
Viimmat!
Okta gii illuda Agnete čuovvut TV:s lea Per Sundnes. Sundnes lea ollu bargan sihke MGP ja ESC-sáddagiiguin, ja dadjá ahte son lea vuordán ahte Agnete birra fas beaggá.
– Jurddaš man somá ahte juste Agnete ja Hanne Krogh sáhttiba humadit! Hanne Krogh han maiddái mánnán šattai beakkánin ja searvvai ESC:ai 1971as, dušše 15 jahkásažžan, dadjá Sundnes.
Journalista Per Sundnes illuda čuovvut Hver gang vi møtes, ja dadjá ahte son guhká vuordán Agnete fas oaidnit almmolašvuođas.
Foto: Julia Marie NaglestadPer Sundnes dadjá ahte son dán vuoru illuda earenoamážit gullat ságastallamiid dáin prográmmain. Agnetes gal várra lea ollu maid sáhttá muitalit, vaikko vel lea ge ain nuorra, dadjá son.
– Ja Agnete artistaeallin ii leat vássanáigi. Dat lea su boahtteáigi, dadjá Per Sundnes.
Ođđa Agnete-prošeakta
Agnete Sabas lea ođđa prošeakta mii ii leat vel almmuhuvvon. Son lea gal veahá almmuhan Instagrammas dán birra, merkejuvvon «Agnete. New music. New beginning.».
Videoin oaidná ahte Emelie Nilsen lea mielde studios. Emelie lei The BlackSheeps joavkku gitárista, ja Agnete lagas ustit mánnávuođa rájes.
- Hver gang vi møtes álgá TV2:is ođđajagis 2021
- Lea 11. geardde ahte dát prográmmaráidu sáddejuvvo. Vuosttaš sáddenjahki lei 2012
- Luohti lea dušše oktii gullon prográmmas, ja dat lei dalle go Elisabeth Andreassen lei bovden Mikkel Gaupa juoigat Trine Rein lávlagis «When heroes are made»
2007: Vuosttaš geardde riikaviidosaš TV-sáddagis. 13 jahkásaš Agnete lávllui Mánáid-TV beassášprográmmas.
Foto: NRK Sápmi
2007: The BlackSheeps guossin NRK Sámi kultursáddagis Árdna. Eai goasse ovdal lean ná nuorra guossit čuojahan dán sáddagis.
The BlackSheeps 2008: Vuite MGP junior 2008 ja MGP Nordic lávlagiin "Oro jaska beana".
2011: Vuosttaš geardde mielde "ollesolbmuid" MGP:as, lávlagiin Dance tonight. Govas lea gitarista Emelie Nilsen.
Nubbin Stjernekamp 2013:is. Dá ovttas vuitiin, Silja Nymoen.
Vuittii Skal vi danse 2014. Dá ovttas Egor Filipenkoin.
2015: Agnete lea maiddái musikálas neavttašan ja lávlon. Dá lea son Dorothy-rollas ovttas Anneli Dreckeriin, gii lei beana Toto, Hålogaland teateris Tromssas.
Go Agnete searvvai nuppes MGP-gilvui, de vuittii ja beasai Norgga ovddastit Eurovision Song Contest 2016:is.
2020: Searvá bivnnut TV2 prográmmii Hver gang vi møtes. Eará artistat geat leat mielde: Hanne Krogh, Maria Mena, Arne Hurlen, Trygve Skaug, Staysman ja Hkeem
