Agnete Saba: – Dál lea áigi ahte sámegiella gullo beakkán TV2-ráiddus

– Mun fuomášin oalle johtilit ahte mus lei bággu sámegillii lávlut Maria Mena lávlaga «My Lullaby», muitala Agnete Saba.

Nu son jearai eatni, Signe Iversena, veahkkin jorgalit ja heivehit lávlaga sámegillii. Soai leaba dan gohčodan «Mu lullánlávlla».

Agnete muitala ahte son muitá juste dán lávlaga iežas mánnávuođas. Sus lei CD man guldalii dávjá, ja dat deaivvai gávcci jahkásaš Agnete njuolga váibmui.

– Tekstii leat čadnon nu ollu čiekŋalis dovddut, ja munnje lei dehálaš čállit dan nu ahte dat heive alccesan maiddái, čilge Agnete.

Viimmat sámegiella

Dál šaddá ge dát beakkán TV2-prográmmaráidu «Hver gang vi møtes » maid historjjálažžan, sámi artistta Agnete Saba vehkiin.

– Gal dál lei ge áigi ahte dán prográmmas maid gullo sámegiella, dadjá Agnete movttegis jienain.

Maria Mena lei 16-jahkásaš go šattai dovddusin dáinna lávlagiin 2002:s, mii muitala movt sus lei go váhnemat earráneigga.

Sániide leat čadnon ollu dovddut. Agnete muitá bures movt sus lei juste ovdal go galggai lávlut dán Maria Menai.

– Ledjen nu balus, ja dovden ahte váibmu julká garrasit, muitala Agnete.

Gatnjalat gal maid golggihedje lávllodettiin. Daid ii nagodan bissehit.

Stuora gudni

– Vuoi, dan stuora gutni! illuda Maria Mena go gullá ahte su lávlla lea dagahan ahte «Hver gang vi møtes» dál lea historjjálaš sámi giela dihte.

Mena muitala ahte son njuorrasii go gulai man čáppat «Mu lullánlávlla» lei go Agnete dan lávllui. Go gullá ahte lávlla lea historjjálaš danne go lea vuosttaš sámegielat lávlla dán ráiddus, de fas njuorrasa.

– Dál go lean gullan daid lávlagiid maid dat eará artisttat leat válljen, de lea hui čielggas ahte «My Lullaby» ii livčče heiven daidda eará artisttaide, dadjá Maria Mena.

Maria muitala ahte son vásihii lávlaga nu earenoamáš čáppahin sámegillii. Fertii irgái riŋget ja muitalit ahte dál lea son gullan iežas lávlaga nu čáppa gillii.

– Mun lean duođai giitevaš, bealle šuohkiha Maria Mena.

Ovttalágan eallin

Agnete ja Maria leigga nuorra nieiddat go beaggigođiiga artistan. Maiddái eará eallinvásáhusat leat ovttaláganat; sudnos leat váhnemat earránan, goappašagat leaba rahčan buozalmasvuođain, ja goappašagat leaba ferten «váldit bottu» almmolašvuođas.

Agnete muitala ahte son lea dovdan ahte Maria lea sutnje buorre doarjjan, geainna lea sáhttán hupmat go eallin lea leamaš váttis. Maria ges dadjá ahte son oaidná ahte Agnete dál lea gievran šaddan.

– Dál mun vuohtán ahte Agnete dahká dan maid ieš háliida, ii ge divtte earáid stivret makkár artista son galgá leat. Ja dan lea nu buorre oaidnit, dadjá Maria.

Giella lea dehálaš

– TV 2:ii lea dehálaš čájehit musihkkamáilmmi máŋggaláganvuođa juste fal «Hver gang vi møtes» prográmmaráiddus.

Dadjá TV2-prográmmaredaktevra Kathrine Haldorsen ja rámida Agnete go lávlu eatnigillii.

– Maria Mena lávlla lea dakkár man ollugat dovdet, ja Agnete dulko dan nu čiekŋalit ja vuohkkasit, dadjá Haldorsen.

• «Hver gang vi møtes» oidno ođđajagimánu 16. beaivvi rájes TV2:s.