Hopp til innhold

Agnete Saba: – Dál lea áigi ahte sámegiella gullo beakkán TV2-ráiddus

Ieš lea artista hui movttet go jurddaša ahte son eatnigielas bokte lea šaddan historjjálažžan dán prográmmaráiddus, gos muđui gullojit dušše eará gielat.

Les saken på norsk

Agnete Saba i hengekøye. Hver gang vi møtes, sesong 11

RUOVTTOLUOTTA: Agnete Saba guhkes boddu lea nohkan. Dál son oidno ovtta Norgga beakkáneamos TV-ráiddus.

Foto: vegardphoto.com / vegardphoto.com

– Mun fuomášin oalle johtilit ahte mus lei bággu sámegillii lávlut Maria Mena lávlaga «My Lullaby», muitala Agnete Saba.

Nu son jearai eatni, Signe Iversena, veahkkin jorgalit ja heivehit lávlaga sámegillii. Soai leaba dan gohčodan «Mu lullánlávlla».

Agnete muitala ahte son muitá juste dán lávlaga iežas mánnávuođas. Sus lei CD man guldalii dávjá, ja dat deaivvai gávcci jahkásaš Agnete njuolga váibmui.

– Tekstii leat čadnon nu ollu čiekŋalis dovddut, ja munnje lei dehálaš čállit dan nu ahte dat heive alccesan maiddái, čilge Agnete.

Viimmat sámegiella

Dál šaddá ge dát beakkán TV2-prográmmaráidu «Hver gang vi møtes » maid historjjálažžan, sámi artistta Agnete Saba vehkiin.

– Gal dál lei ge áigi ahte dán prográmmas maid gullo sámegiella, dadjá Agnete movttegis jienain.

Ung Maria Mena

NUORRA ARTISTA: Dá lea Maria Mena govvejuvvon dalle go beaggigođii lávlagiin «Lullaby».

Foto: Agnete Brun

Maria Mena lei 16-jahkásaš go šattai dovddusin dáinna lávlagiin 2002:s, mii muitala movt sus lei go váhnemat earráneigga.

Sániide leat čadnon ollu dovddut. Agnete muitá bures movt sus lei juste ovdal go galggai lávlut dán Maria Menai.

– Ledjen nu balus, ja dovden ahte váibmu julká garrasit, muitala Agnete.

Gatnjalat gal maid golggihedje lávllodettiin. Daid ii nagodan bissehit.

Stuora gudni

– Vuoi, dan stuora gutni! illuda Maria Mena go gullá ahte su lávlla lea dagahan ahte «Hver gang vi møtes» dál lea historjjálaš sámi giela dihte.

Maria Mena, Hver gang vi møtes sesong 11

ILLUDA OVTTAS AGNETIIN: Maria Mena dadjá ahte lávlla mearkkaša nu ollu sutnje, ja lea nu giitevaš go Agnete lávllui sámegillii.

Foto: Vegard Breie / TV2

Mena muitala ahte son njuorrasii go gulai man čáppat «Mu lullánlávlla» lei go Agnete dan lávllui. Go gullá ahte lávlla lea historjjálaš danne go lea vuosttaš sámegielat lávlla dán ráiddus, de fas njuorrasa.

– Dál go lean gullan daid lávlagiid maid dat eará artisttat leat válljen, de lea hui čielggas ahte «My Lullaby» ii livčče heiven daidda eará artisttaide, dadjá Maria Mena.

Maria muitala ahte son vásihii lávlaga nu earenoamáš čáppahin sámegillii. Fertii irgái riŋget ja muitalit ahte dál lea son gullan iežas lávlaga nu čáppa gillii.

– Mun lean duođai giitevaš, bealle šuohkiha Maria Mena.

Dá lea lávlla mainna 16 jahkásaš Maria Mena šattai dovddusin.

Ovttalágan eallin

Agnete ja Maria leigga nuorra nieiddat go beaggigođiiga artistan. Maiddái eará eallinvásáhusat leat ovttaláganat; sudnos leat váhnemat earránan, goappašagat leaba rahčan buozalmasvuođain, ja goappašagat leaba ferten «váldit bottu» almmolašvuođas.

Maria Menas dag, Hver gang vi møtes

SIN OAINNÁT DÁN HÁVE: Agnete Saba, Trygve Skaug, Arne Hurlen, Stian «Staysman» Thorbjørnsen, Hanne Krogh, Abdulhakim «Hkeem» Hassane ja Maria Mena.

Foto: Vegard Breie / TV2

Agnete muitala ahte son lea dovdan ahte Maria lea sutnje buorre doarjjan, geainna lea sáhttán hupmat go eallin lea leamaš váttis. Maria ges dadjá ahte son oaidná ahte Agnete dál lea gievran šaddan.

– Dál mun vuohtán ahte Agnete dahká dan maid ieš háliida, ii ge divtte earáid stivret makkár artista son galgá leat. Ja dan lea nu buorre oaidnit, dadjá Maria.

Giella lea dehálaš

Kathrine Haldorsen, Programredaktør TV2

DUHTAVAŠ HOAVDA: TV2-prográmmaredaktevra Kathrine Haldorsen dadjá ahte sámegiella čájeha man rikkis musihkkamáilbmi lea.

Foto: Eivind Senneset / TV 2

– TV 2:ii lea dehálaš čájehit musihkkamáilmmi máŋggaláganvuođa juste fal «Hver gang vi møtes» prográmmaráiddus.

Dadjá TV2-prográmmaredaktevra Kathrine Haldorsen ja rámida Agnete go lávlu eatnigillii.

– Maria Mena lávlla lea dakkár man ollugat dovdet, ja Agnete dulko dan nu čiekŋalit ja vuohkkasit, dadjá Haldorsen.

  • «Hver gang vi møtes» oidno ođđajagimánu 16. beaivvi rájes TV2:s.
Agnete Saba hyller Maria Mena på samisk, som også er historisk for programmet.

Dás oainnát oasáža dan vuosttaš prográmmas mas Agnete Saba gudnejahttá Maria Mena sámegillii. Govat: TV2

Korte nyheter

  • Gárttai buohccevissui go várjalii nissona sámevaši vuostá

    Klemet Anders Buljo lei ovttas Ann-Mari Pettersen Maggain ja eará gussiiguin jođus ruoktot heajain Álttás sotnabeaivvi čuovganeapmái, go muhtun almmái galgá leat dadjan rasisttalaš dadjamušaid sápmelaččaid birra Maggai.

    Klemet Anders Buljo galgá leat geahččalan jaskkodahttit albmá, juoidá maid álggus nagodii. Go vázzilii eret albmá luhtte, de galgá son leat rohkkáhan Buljo.

    – Fáhkkestaga hoigadii mu nu ahte gahččen vázzinravddas, ja nu doddjui čibbeskálžu, muitala Buljo NRK:i.

    Buljo soaitá šaddat čuohpadit čippi.

    Politiija áššáskuhttinovddasvástideaddji, Cecilie Evertsen, ii muital detáljaid dáhpáhusas, muhto duođašta NRK:i ahte politiijat ledje báikkis. Almmái lea váidojuvvon ja ášši dutkojuvvo.

    Klemet Anders Buljo på sykehuset
    Foto: Privat
  • Hilgu Muolkkuid elektrifiserema

    Les på norsk.

    Finnmárkku stuorradiggeáirras Guovddášbellodagas, Geir Adelsten Iversen, hilgu Muolkkuid elektrifiserema. Son oaivvilda ahte eai olat ráđđehusa eavttuid elektrifiseremii.

    – Mii geat dovdat Finnmárkku diehtit ahte ná stuorra elfápmohuksen ii dáhpáhuva 2030 ovdal. Danne lea dušše hilgut Muolkkuid elektrifiserema ja mearridit ahte doalahat gássafápmorusttega, dadjá Iversen.

    Son dadjá ahte Norgga váráiduhttinsihkarvuođa ferte sihkkarastit nationála fápmovuogádaga bokte, ovdal go Muolkkuid sáhttá elektrifiseret.

    – Stuorra bieggafápmohuksen ii leat čoavddus. Dat bilida dehálaš ealáhusaid Finnmárkkus.

    Geir Adelsten Iversen
    Foto: Simon Piera Paulsen / NRK
  • Avlyser elektrifiseringen av Melkøya

    Loga sámegillii.

    Finnmarks stortingsrepresentant for senterpartiet, Geir Adelsten Iversen, vil avlyse elektrifiseringen av Melkøya. Han mener regjeringens forutsetninger for elektrifiseringen ikke vil bli oppnådd.

    – Vi som kjenner Finnmark ser at en så stor kraftutbygging ikke kommer til å skje innen 2030. Derfor er det bare å avlyse elektrifiseringen av Melkøya og slå fast at gasskraftverket står, sier han.

    Han sier at Norge må sikre forsyningssikkerheten gjennom det nasjonale kraftsystem før Melkøya kan elektrifiseres.

    – Massiv utbygging av vindkraft er ikke veien å gå. Det vil ødelegge for viktige næringer i Finnmark.

    Geir Iversen (Sp) inne i stortingssalen. Iversen kommer fra Hasvik kommune i Finnmark.
    Foto: Erlend Hykkerud / NRK