Jus lea juoga man mii ođđaáiggi olbmot dárbbašat hárjehallat, de lea gulul váldit. Hušša lea ođđa álbmotdávda, ja hušša váikkuha olles olmmošlaš organismma.
Rumaš ja siellu ráhčaba leat balánssas, nu mo buot eallit dahket; muttát gallás, muttát gozuid alde, muttát liekkas ja muttát movtta.
Orrugo oahpes ášši dá?
Min rumaš áinnas háliidivčče leat dássedit, go dalle das lea buoremus.
Jus šaddá menddo ollu bargat menddo unnán diimmuin, de aŋkke dovddan mun ahte šaddá eanet hušša. Mus coahkkigoahtá váibmu johtileabbo, váibmu julká, ja dovddan ráfehisvuođa olles rupmašis.
Lea unohas, ja mun darragoađán vai gearggan johtileabbo. Dábálepmosit ii láve mannat bures, ja dalle šaddá vel eanet hušša. Dáidet leat eambbosat geat maid dárbbašit hárjehallat ahte eai hohpohala.
Hárjánit ahte ádjána nu guhká go ádjána, ii guhkit ii oanehat; ja buot eanemus de hárjehalan dahkat ovtta ášši ain hávális. Dalle mun dábálepmosit gearggan.
Dát joavku čuojaha Adveantakaleandaris.
Foto: Beate heideGo doalahan fuomášumi das man galggan dahkat dál, de lean nannosat iežan rupmaša siste. Sáhtán dovdat ahte rumaš vuoiŋŋasta stuolus, ahte váibmu coahkká sivvadit, ja jus mus lea lihkku, de illudan go lean dahkamin dan maid dagan justa dál.
Dat de lea baicce vuogas! Mu sávaldat lea ahte olles mu eallin, aŋkke buot árgabeaivvit, go dat leat eanemus, galget leat nu. Mus lea buoremus go nagodan eallit nu. Dađibahábut ii leat juohke beaivi nu ahte lean nu sajis, muhto gaskkohagaid juohke áidna beaivvi lean balánssas iežainan. Dalle lean váhteris.
Mun dovddan ahte áigi ovdal juovllaid lea hástaleaddji hušša dáfus. Goitge šaddet juovllat, muitala mu vásáhus - ja lean ávvudan juovllaid eanet go vihttalogi geardde ovdal, nu ahte das ferte leat veahá dadjamuš, vásáhusas?
Nu ahte dál vuoiŋŋan čovjjiin ja hárjehalan ahte in galgga dadjat in ge dovdat ahte mus lea hoahppu.
