NRK Meny
Normal

Adveantakaleandar 17.12.16: Beassečiŋat

Dán jagi adveantakalenandara lea Beate Heide buvttadan NRK Sápmái.

Beassečiŋat
Foto: Beate Heide

Juovlačiŋaid sáhttá ráhkadit ollu iešguđetlágan ávdnasiin. Ii leat eisege dábálaš ráhkadit juovlačiŋaid beassis. Soahkebeassin gohčoduvvo olggumuš oassi soahkemuoraid bárkkus. Lea álki njaldit beassi muorain. Hui gieđalaš olbmot lávejit ráhkadit golmmadimenšunálalaš násttiid beassis. Nu dahká maiddá Arne. Lea ártet oaidnit stuorra almmáiolbmočorpmaid gierdevaččat coggat beassebihtážiid siskálagaid, orro measta veadjemeahttun bargu.

Dan botta go beassedávvir jorahuvvo gieđas, diimmu mielde, rohttejuvvojit geažit johtilit ja hárjánan sisa ja olggos vai šaddet čohkat nástái. Ovdal go olmmoš oba háhppeha ge jurdilit de lea unnimus ja epmoleamos beassenásti gárvvis. Geažit čuhppojuvvojit eret, ja de giddejuvvo dasa árpu mainna sáhttá heŋget nástti - ja de lea násti gárvvis ja jođus máilbmái muhttin juovlamuora lusa man sáhttá čiŋahit. Luondduivnnat juovlačikŋa ii leat nu čalbmáičuohcci, muhto muittuha meahci ja eará muoraid go heaŋgá dies juovlanigáid ja eŋgeliid gaskkas muoras.

Adveantakaleandar joavku
Foto: Beate Heide

Arne, gean oidnen ráhkadeamen beassenásttiid, dajai ahte son ráhkada daid doalahan dihte suorpmaid soddjilin. Sus lea leasmedávda ja justa dát doaibma heive sutnje. Háleštettiin ráhkadii son sihke smávva ja stuorra násttiid. Lei dego noaidegoansta, ja lei somá oaidnit su gieđaid bargat.

Dál heaŋgá beassenásti mu muoras. Mojohalan go oainnán dan, ja smiehtan Arne stuorra gieđaid birra mat leat ráhkadan dan munnje. Ja de lea vuogas ahte lea dakkár lunddolaš čikŋa maid juovlamuoras, lea earálágan ja dagaha ahte loavttán iežan juovlamuorain, mas leat čiŋat máŋgga báikkis ja máŋgga lágan ávdnasiin.