NRK Meny
Normal

Adveantakaleandar 16.12.16: Leat eadni mánnái almmis

Dán jagi adveantakalenandara lea Beate Heide buvttadan NRK Sápmái.

Leat eadni mánnái almmis
Foto: Beate Heide

Maritas ja mus lea juoga oktasaš ollu eará etniiguin; munnos lea mánná almmis. Ii leat dábáleamos vuohki leat eadnin, ahte lea massán máná jápmimii. ii leat álgage álki leat eadni soapmásii guhte lea vádjolan áiggis eret. Eatni váibmui báhcá stuorra hávvi mii ii goassige ollásit savu. Go lea eadni, de lea vuogas leat dan ealli mánnái, iige nammii mii lea galbma geađggis girkogárddis. Muhttimat jápmet menddo nuorran. Mánát jápmet njulgestaga mis; lea luonddulága vuostá ahte mánát galget jápmit ovdal iežaset váhnemiid. Lea váttis massit iežas máná; lea dego massit oasi alddis. Dego massit váimmu.

Adveantakaleandar joavku
Foto: Beate Heide

Maid Maritain hálle dávjá iežame mánáid birra; Ida ja Fredrika birra. Lávejetne cahkkehit gintaliid sudno ovddas, sihke girkogárddis ja ruovttus. Juovlaáigi lea erenomáš rašši midjiide geain lea okta mánná menddo unnán. Dalle ihtet jurdagat mo sii livčče leat oaidnit dál, makkár eallima sii ealášedje ja makkár oktavuohta mis livčče leamaš sidjiide. Buot mii ii šaddan. Buot doaivagat mat cuovkanedje go mánná jámii. Buot niegut mat botkejuvvo. Buot dat moraš ja bávččas mii čuovvu ohcaleami.

Moai Maritain letne oahppan ahte ii sáhte vuordit ahte lea diehttelas ášši, beassat doalahit máná. Moai sáhtte juogadit dán ohcaleami. Dieinna lágiin lea munnos lihkku.

Dát dagaha soaitá maiddá ahte munnos lea veahá eanet vuollegašvuohta eallimii; dát seakka siibma man alde mii balanseret oanehis áiggi dáppe eatnama alde. Ja de dovde giitevašvuođa daid ovddas mii munnos lea, vaikke dat ráfehisvuohta álo lea doppe, dan máná dihte mii munnos váilu. Dan máná ovddas geasa ean sáhte plánet juovlaskeaŋkkaid.