Adveantakaleandar 12.12.16: Lagašadopšuvdna

Ollu stuorra organisašuvnnat jođihit gáiddusadopšuvdnadoaimmaid. Prinsihppa lea ahte mun sáhtán leat veahkkin máksit oahpahusa ja bajásšaddama mánnái eará riikkas mii boahtá bearrašis mas leat unnán vejolašvuođat birget veahki haga. Mii Norggas dovdat dákkár doaimmaid bures, ja mu mielas orru nu ahte ollu bearrašat bovdejit ovtta "liigemáná" gáiddusadopterema bokte.

Lea álki oaidnit dan mearehis heađi ovdánahttinriikkain, ja go veahkehat ovttaskas olbmo de mii dovdat ahte sáhttit leat ávkin. Dattege ii leat nu álki oaidnit heađi min iežamet riikkas. Geafivuohta mii dagaha ahte ollu nuorat rahčet árgabeaivvis, eaige suitte buot maid earát suitet; justa danne go váhnemiin lea gáržžes dilli ruđalaččat. Dát nuorat maid dárbbašit ahte muhttin oaidná sin. Dákkár nuorat sáhttet dárbbašit liigebearraša geain sihke lea sadji sidjiide váimmuin, ja áinnas bonjastit ođđa skuovaid ja bileahta ruoktut juovllaide sidjiide.

Mu ustit Marit lea okta sis guhte oaidná dáid nuoraid. Son duste daid ja váldá sin iežas soajáid vuollái, ja iežas stuorra váimmu sisa. Son oaidná maid sii dárbbašit - ja jaskadit son láhčá sidjiide liegga biktasiid, ođđa fáhcaid ja šuhkoládaža. Son doalvu skeaŋkkaid liegga mojiin, guoibmás koarttain, ja addá nuoraide dan dovddu ahte sii dahket sutnje buori go váldet vuostá skeaŋkka. Marit lea áidnalunddot. Son ii vuordde rámi ii ge diploma iežas barggu ovddas. Son dahká dan dušše danne go oaidná ahte dárbbašuvvo.

Mis galggašit leat eambbosat geat leat nie mo Marit. Dákkár fuolahusbargit lagašbirrasis geat jienajávohaga doaimmahit áššiid. Geat dustet hállat nuoraiguin, ja dustet suokkardit sin máilmmi. Jus son ii livčče dan dahkat, de ii lean diehtit maid sii dárbbašit! Várra in dárbbaš dadjat ahte Maritas leat ollu nuorra skihpárat; Skihpárat geat sáddejit sutnje dieđu muitalit iežaset smávva ovdánemiid birra, ja geat áinnas háliidit juogadit iežaset ilu suinna. Lea soaitá juoga man eambbosat mis sáhtášit smiehttat; Viiddidit bearraša "lagašadopšuvnna" bokte?