Čállán: Anna Anita Hætta Guttorm
Son geasuha olbmuid filbmii, nugo váldoneavttárin Ofelaš filmmas, ja dál fargga váldorollas Nils Gaup “1852-filmmas” Guovdageainnu stuimmiid birra. Muhto soabmásat oaivvildit Mikkel Gaup viggá gávppašit sámi vuoiŋŋalašvuođain, šaddat vel eanet dovddusin.
Mannan gease moittiige sámi girjjálašvuođa- ja kulturdutki Harald Gaski áviissa Nordlysis Mikkel Gaup, go Gaski mielas orru Gaup leaikkaid (“gjøgleri”) ráhkadeamin sámi oskkus. Moaitta bođii máŋŋil go Gaup lei searvvis lágideamin “Mátki-Reisen”, Riddu Riđu doaluid oktavuođas. Mátki ulbmil lei addit olbmuide noaidevuođa ja luođi vásáhusaid.
- Harald Gaskis lea dieđus lohpi cuiggudit dan jos spiehkastat árbevirolašvuođas, muhto ii lean riekta čuoččuhit ahte mii bilkideimmet sápmelašvuođa. Munnje lei váivi go botnjet duohtavuođa, dego mu bargu livččii unohas ja fasti, danin go sii geat eanemusat moitet eai leat ba fitnange doaluin, lohká Mikkel Gaup.
Romssa dálkkodeaddjiid-measuin (Alternativmessen 2007) mannan vahkkoloahpa fálai son guovtte beaivásaš kurssa guovttelot olbmuide oahpasmuvvat luođi famuin. - Mun in dieđus jáhke dan ahte olbmot guovtte beaivves šaddet juoigit. Olbmot fertejit orrut sámi ruovttus unnimus logi jagi oažžut dan rivttes dovddu. Muhto luođi metodaid áinnas oahpahan, ja jáhkan maiddái ahte luođis lea dálkkodan vuoibmi.
- Mun ieš leamaš sihke vuollin kealláris ja badjin bálvvaid vuolde, dál háliidan iežan vásáhusaid ja attáldagaid geavahit eará olbmuide veahkkin, dovddasta Mikkel Gaup.
Lohká leat fargga 20 jagi dassái go su ádjá vuosttaš geardde jearai sus, dalle go Mikkel lei 21 jagi boaris, ii son go váldde badjelasas noaidevuođa, mii sutnje lei oidnojuvvon. - Muhto dalle ledjen menddo nuorra áddet vuoiŋŋalašvuođa čiekŋalasvuođaid, dál mun dieđán buoret. Dál lea mus alddán eallinvásáhus, dál livččen gearggus láidestit earáid ráfáleabbu eallimii.
Mikkel Gaup lea Alternativmessen 2007 -áviisii muitalan son doarju prinseassa Märtha Louise eŋgel-osku. Gaup jáhká ahte eŋgelat buktet vástádusaid jearaldagaide. – Eŋgelat čujuhit buori guvlui, go olmmoš lea váttisvuođaid siste, dan lean ieš maid moatte geardde vásihan. Ádjás lean fas biibal-sániid bokte oahppan dálkkodit earáid. Dáid sániid eai buohkat dovdda.
Son jáhkká vuoiŋŋalašvuohta doaibmá sihke teáhterlávdde alde, filmmain, juoiggadettiin ja dálkkodettiin. Mikkel Gaup háliida juogadit olbmuiguin dan buoremusa, sihke ráhkesvuođa ja ovddasmorraša, go buot olbmot dárbbašit lieggasa nuppiin birgehallat máilmmis.