NRK Meny
Normal

Danen sihtá ådådárogiellasiebrre sáme namájt adnet

Duodden dárogiellanammaj la siebrren dálla guokta ådå namá.

Marta Nagel-Alne

Biergunstudentaj ådådárogiellasiebre jådediddje Marta Nagel-Alne mielas la julevsámenamma Biergun tjáppa namma.

Foto: Fredrik Hope

– Duodden dárogiellanammaj Studentmållaget i Bergen la siebrren dálla julevsámenamma Biergunstudentaj ådådárogiellasiebrre ja guojnagiellanamma Perunan studenttikielijoukko, diedet Biergunstudentaj ådådárogiellasiebre jådediddje Marta Nagel-Alne.

Julevsámegielav åvddånbuktet

Suv mielas la huj suohtas gå julevsámijn li sierra sáme namma Biergunij, ja dan siehti sihtá dárogiellasiebrre dáv sáme namáv åvddånbuktet.

– Duodden la julevsámenamma Biergun tjáppa namma, ja danen dav válljijma.

Nagel-Alne diedet siebrre sihtá dåssju avta sáme namáv, ja akta sivájs manen válljijin julevsámenamáv lij gå julevsámegiella ij la sebrudagán nav vuojnnusin.

– Ávkke la válljit ådå namájt gielajs ma li juo Biergun-stádaj tjanádum. Juska sámegiella ja guojnagiella dájn bájkijn ælla nav ålov ságastuvvam, de la stáda læhkám ájnas oasesstáda nuorttavuonagijda.

Ietja siebrijt hasodi

Ådådárogiellasiebrre la ietjá siebrijs bájnoduvvam dán ássjen, diedet siebre jådediddje.

– Luonndo ja nuora (Natur og ungdom), Guovdásjnuora (Senterungdommen), Ruodná nuora (Grønn ungdom), duodden nágin ietjá siebre li juo sáme ja guojna namájt válljim, ja danen mij måvtåstuhteduvájma ådå namájt åttjudit.

Juska Biergunstudentaj ådådárogiellasiebrre dálla li ådå namájt åttjudam, de ælla dajnas dudálattja.

– Sihtap Norsk Målungdom aj galggá sáme ja guojna namájt åttjudit, ja galggap dájna ássjijn barggat.

Dálla sij ietjá siebrijt hasodi sáme ja guojna namájt åttjudit.

– Vuonarijkan li moadda giela, ja dát la huj ájnas. Moattes ságasti ådådárogielav ja dajt ietjá gielajt, ja ij la nav Vuonan la dåssju akta giella.